Fakafaingofua‘i ‘o e Fenga‘unu‘aki Takai Holó ‘i he Kāinga Ora

‘I homau ngaahi ‘apí

‘Oku lolotonga fakafo‘ou ‘a e peesí ni ‘aki ha fakamatala lahi ange kau ki he fakalakalaka kuo fakahoko ‘e he Kāinga Orá ‘i he‘ene Tu‘utu‘uni Ngāue ki he Ngaahi ‘Api Tūkunga Lelei ki he Fenga‘unuaki Holó. ‘E maau ‘a e peesi kuo fakahoko hono fakafo‘oú ‘i he vavé ni maí.

‘Oku fakahoko atu ‘e he palani fakalūkufuá ha ngaahi fale nofo‘anga ma‘á e kakaí ‘oku toe lelei ange ki he nofó ma‘á e kakaí hono kotoa, kau ai ‘a e (kae ‘ikai fakangatangata pē ki he) ngaahi fāmili kei ta‘u si‘i mo kei tupulaki hake ‘a ‘enau longa‘i fānaú, kakai ‘o e ngaahi ta‘u motu‘a kehekehe kuo nau a‘usia ha lavea pe puke fakataimi pē, kinautolu kuo hoko ha palopalema ki he‘enau nga‘unu takai holó, sió pe tūkunga fakakaukaú, pea mo e faka‘au ko ia ke tupu tokolahi ‘a e kakai matu‘otu‘a angé/toulekeleká. 

‘Oku fakakau ‘i he palani fakalūkufuá ‘a e ngaahi tafa‘aki lalahi ko ‘ení:

• Hū‘angá: ngaahi hala fā-‘atā meí he tau‘anga me‘alelé mo e hala pule‘angá, ‘o ‘ikai fakasitepu kapau ‘oku malava ‘eni, pe ko e malava ke fokotu‘u ha halanga lue lalo pe teke‘anga saliote (ramp) ‘i he kaha‘ú.
• Faingofua ki hono faka‘aonga‘í: ngaahi kau (handles) ki he matapaá pea mo e ngaahi kōpaté ‘oku faingofua hono ngāue‘akí, tu‘u fakataha ‘a e fale kaukaú mo e loki mohé ‘i he fungavaka tatau mo e lotofalé (pe ko e lava ke liliu ‘eni ‘i ha taimi kehe ange ‘i he kaha‘ú ke ma‘u ai ‘a e tūkunga ko ‘ení).
• Tu‘unga malu mo haó: faliki ‘oku ‘ikai hekeheke ‘i he ngaahi fale kaukaú mo e peitó.
• Liliu ngofua: fale kaukau lahi fe‘unga ke liliu kakato ke faingofua ai ‘a e fenga‘unu‘aki takai holó kapau ‘e fiema‘u ‘i he kaha‘ú (koe‘uhí kapau ‘e fiema‘u ‘eni, te mau toki fokotu‘u ‘eni ‘amui ange) ‘a ia ko e toki fokotu‘u ko ‘eni ‘amui angé (retrofit) ‘oku kaunga atu ia ki he polokalamá kakato.

Ma‘a ‘emau kau kasitomaá

‘Oku mau fakalelei‘i ‘a e tu‘unga ‘o hono fakafaingofua‘i ‘a e fenga‘unuaki takai holó ‘i homau ngaahi ‘api pule‘anga fo‘oú mo e lolotongá, ma‘a ‘emau kau kasitomaá. Ko ‘emau taumu‘á ke fakaai ha ngaahi ‘api malu ‘oku lava ai ‘a e kakaí ‘o nofo tau‘atāina ‘o ‘ikai toe fakafalala, lava ‘o fakaafe‘i ki ai honau kāingá mo e ngaahi kaungāme‘á ke nau ‘a‘ahi ki ai, pea mo nau hoko ai ko e kupu ‘o e komiunitī ‘oku nau nofo aí ‘o ‘ikai ha ngaahi ‘ā vahevahe/fakafe‘ātungia ki ai.

• ‘Oku ma‘u meí he hoa ngāué ha ‘api ki he toenga ‘o e mo‘uí
• Meí he mohenga ‘i he falemahakí ki ha ‘api māfana mo mātu‘u
• ‘Oku fe‘ungamālie pē ‘a e ‘api fo‘oú

Kuo ‘osi fakamo‘oni ‘a e Kāinga Ora ki ha Accessibility Charter (Siate Ngāue ki hono Fakafaingofua‘i ‘a e Fenga‘unuaki Takai Holó).(external link) ‘I he siaté, ‘oku mau tukupā ai ki hono fakapapau‘i ‘oku lava ‘a ‘emau kau kasitomaá ‘o fengāue‘aki mo ‘emau ngaahi sēvesí ‘i ha founga ‘oku fakalato ai ‘a ‘enau ngaahi fiema‘u fakafo‘ituituí pea faka‘ai‘ai ai ‘a ‘enau nofo tau‘atāina ‘o ‘ikai toe fakafalalá pea mo honau ngeiá. ‘Oku ‘uhinga ‘eni ‘oku mau fakapapau‘i ‘oku mau fengāue‘aki mo e kakaí ‘o fakafou ‘i ha ngaahi founga ‘oku faingofua ‘a hono ma‘u atú, kau ai ‘a e ngaahi tohi mata lalahí mo ha ngaahi vitiō ‘oku tohi atu ‘i he ‘atá ‘a e leá (captioned).