Fanongonongo ki he Tauhi Malu ‘o e Fakamatalá
‘Oku fakamatala‘i ‘e he fanongonongo ki he tauhi malu ‘o e fakamatalá ‘a e founga ‘oku tokanga‘i ai ‘e he Kāinga Ora – Homes and Communities ho‘o fakamatala fakafo‘ituituí.
‘Okú ne fakahoko atu ke ke ‘ilo ‘a e founga ‘oku mau tānaki ai, tauhi, ngāue‘aki mo e ngaahi tūkunga te mau ala fakahā atu ai ki ha taha/fa‘ahinga ho‘o fakamatalá; founga te ke lava ai ‘o vakai pe fakatonutonu ho‘o fakamatalá; mo e founga te ke lava ai ‘o fai ha lāunga fekau‘aki mo e tu‘unga malu ‘o e fakamatalá.
Talateu
Ke a‘usia ‘emau vīsone ke Langa ha ngaahi ‘api, komiunitī mo e ngaahi mo‘ui lelei ange, mo faka‘ofo‘ofa ange, ‘oku mau fakahoko ai ha ngaahi ngafa tefito lahi. Ko kimautolú ko ha:
- lenilooti ki he ngaahi fale ‘a e pule‘angá ma‘á e kakaí
- kautaha langa fakalakalaka ‘i he feitu‘u koló pea mo ha kau langa ‘o e ngaahi fale ma‘ama‘a ma‘á e kakai mo e ngaahi ‘api nofo‘anga ‘i he māketí, mo e
- pule ‘o e ngaahi koloa mo e ngaahi polokalama tokoni ‘a e pule‘angá ki he ma‘u ‘apí.
Ke fakahoko kotoa ení, ‘oku fa‘a fiema‘u ke mau tānaki mai pea ngāue‘aki ho‘o fakamatala fakafo‘ituituí.
Ko e me‘a ‘oku mau tānakí ‘oku makatu‘unga ia ‘i he founga ‘oku mau ngāue ai mo koé mo e ngāue ‘oku mau fakahoko atú, ka ko e fakamatala fakafo‘ituituí ‘e ala kau ki ai ‘a e:
- ngaahi me‘a fakapepa ki he ‘ilo‘i‘angá, hangē ko e tatau ‘o ho‘o paasipooti Nu‘u Silá, tohita‘u, pe ko e fakapapau‘i‘anga ‘o e nofo fonuá kapau ‘oku ‘ikai ko ha tangata‘ifonua Nu‘u Sila koe
- ho hingoá
- ‘aho fā‘ele‘í
- ho tua‘silá
- ko ho‘o ngaahi fika telefoní mo e tu‘asila ‘īmeilí
- ko hai ‘oku nofo ‘i ho ‘apí
- ko e fanga monumanu pusiaki ‘okú ke ma‘ú
- ko e tu‘unga lelei ‘o e ‘api ‘okú ke nofo totongi aí
- ngaahi fakaikiiki fakapangikeé, hangē ko hono fokotu‘u ha totongi fakahangatonu mai kiate kimautolu
- ngaahi fakaikiiki ‘o e ngāue‘angá, hangē ko ha‘o fakamafai‘i ‘a e ngaahi to‘o pa‘anga mei ho‘o vahé
- ko e tu‘unga ho‘o ngāué, fakamo‘oni ‘o e pa‘anga hū maí mo ha toe fakamatala fakapa‘anga kehe, hangē ko e fakamatala pa‘anga ho‘o ngaahi to‘o pa‘anga ki he KiwiSaver.
‘Oku mau tānaki mai ‘a e fakamatala fakafo‘ituituí ki he ngaahi taumu‘a fakalao ke fakahoko ‘aki homau ngaahi ngafá pea mo fakahoko atu ‘aki ‘a e ngaahi ngāue kiate koé.
‘Oku kau ki heni ha:
- ‘ilo‘i pe ko hai koé
- fetu‘utaki atu kiate koe
- fakakaukau‘i ‘a e founga ‘e lava ke mau tokoni atu aí
- fakapapau‘i ‘oku fakahoko ‘a ho‘o aleapau ki he nofo totongí ‘o fakatatau ki he Lao ki he Ngaahi ‘Api Nofo Totongi 1986 (Residential Tenancies Act 1986) mo e Lao ki he Fale Nofo‘anga ‘o e Kakaí mo e Komiunitií 1992 (Public and Community Housing Act 1992)
- fakapapau‘i ko e ngaahi ngāue fakapa‘anga kotoa pē ‘oku mau ‘oatú ‘oku fakahoko atu ia ‘o fakatatau ki he lao ‘oku fekau‘aki mo iá.
‘Oku mau tānaki mai ‘a e fakamatala fakafo‘ituitui meiate koe ‘i he taimi ‘oku mau fengāue‘aki ai mo koé. ‘E ala hoko eni ‘i ha ngaahi founga ‘e ni‘ihi, kau ai ‘a e taimi ‘okú ke:
- talanoa ai mo kimautolu ‘i he telefoní, hangē ko e taimi ‘oku mau hiki ai ha ki‘i nouti ‘o e fetu‘utaki telefoni ko iá pe ko hono hiki ‘a e fetu‘utaki telefoní ‘e he ‘emau senitā fetu‘utakí
- fetaulaki ai mo kimautolu ‘i ha ‘ōfisi Kāinga Ora pe ‘i ho ‘apí
- fetu‘utaki mo kimautolu fakafou ‘i he ‘īmeili, pōpōaki telefoni (text) pe ‘i he ‘initanetí hangē ko ‘emau foomu ki he fakakaukau ke tokoní
- fakafonu ai ha foomu Kāinga Ora (‘i he ‘initanetí pe ‘i ha pepa)
- lēsisita pea ngāue‘aki ha ‘akauni ‘i he MyKāingaOra
- lēsisita ke ma‘u ‘a e ngaahi fakamatala fakamuimuitahá ‘i he ‘īmeilí.
Ko e angamahení ‘oku mau feinga ke mau tānaki fakahangatonu pē ‘a e fakamatala fakafo‘ituituí meiate koe.
Ka neongo eni, te mau ala ma‘u ho‘o fakamatala fakafo‘ituituí meí ha kakai pe kau ngāue fakafofonga kehe, hangē pē ko ho‘o ‘omai ‘a e ngofua kiate kimautolu ke mau ma‘u mai ia mei ho‘o tokotaha fakafofongá pe kautaha kehe mei tu‘a.
‘Oku mau ma‘u mai ia meí he ngaahi kautaha fakapule‘anga kehé ‘i he taimi ‘oku ‘i ai ai ha ngaahi ‘uhinga fakalao ke mau kole atu ai ‘a e fakamatalá.
Ko e fakatātaá, kapau ko ha tokotaha nofo totongi koe, te mau ma‘u mai ‘a e fakamatala fakafo‘ituituí meí he kautaha kuo fili ko e fakafofonga ki he fale nofo‘anga ki he fa‘ahinga ‘oku mā‘ulalo ‘enau tu‘unga fakapa‘angá – Ministry of Social Development (MSD) – ‘i he malumalu ‘o e lao Public and Community Housing Act 1992.
‘Oku tu‘utu‘unia ‘e he MSD pe ko hai ‘oku taau ke ne ma‘u ha fale ‘oku ma‘á e kakaí pea ‘omai ai kiate kimautolu ‘a e fakamatala fakafo‘ituitui fekau‘aki mo koe pea mo e fa‘ahinga ‘oku nofo ‘i ho ‘apí ‘oku mau ngāue‘aki ke fakahoko ‘aki homau fatongia ko ha kautaha ‘okú ne tuku atu ‘a e fale nofo‘anga ki he fa‘ahinga ‘oku mā‘ulalo ‘enau tu‘unga fakapa‘angá, ke vakai‘i ‘aki ‘a e tu‘unga faingamālie ‘o e ngaahi fale ma‘á e kakaí mo e ‘oatu kiate koe ha ‘api fe‘ungamālie ‘oku makatu‘unga ‘i ho‘o fiema‘ú mo e ‘atā atu ki aí.
‘Oku fakakau ‘e he MSD ‘a e fakamatala fekau‘aki mo ho‘o:
- tu‘unga fiema‘u fale nofo‘angá
- ko e kalasi/fa‘ahinga mo e feitu‘u ‘oku tu‘u ai ‘a e ngaahi fale ‘oku ngalingali ke fe‘ungamālie mo koe mo e fa‘ahinga ‘oku mou nofo fakatahá
- fakamatala ‘oku ‘i ai ‘ene felāve‘i mo e hokohoko lelei atu ‘a e nofo totongí, mo e
- Income Related Rent (Totongi Nofo ‘oku Felāve‘i mo e Tu‘unga Fakapa‘angá) ‘oku fika‘i atu kiate koe mo e fa‘ahinga ‘oku mou nofo fakatahá.
‘Oku mau fa‘u mo tauhi ha ‘ātakai malu ke malu‘i ai ho‘o fakamatala fakafo‘ituituí mo ho ngaahi lekootí. Ko ‘emau ngaahi fa‘unga ngāué ‘oku siofi mo muimui‘i, ‘analaiso mo ‘ātita‘i.
Ko e kau ngāue, ngaahi hoa ngāue ki he monomonó mo e fefakatau‘aki kotoa ‘a e Kāinga Ora ‘oku fiema‘u ke nau ngāue ‘o fakatatau ki he lao Privacy Act 2020 ‘i he taimi ‘oku nau ngāue‘aki ai ho‘o fakamatalá.
‘Oku fakahoko ki he ‘emau kau ngāué ha ako ke fakapapau‘i ‘oku ngāue‘aki ho‘o fakamatalá ‘i ha founga faka‘apa‘apa, tokanga‘i lelei mo tokanga.
Ngāue‘aki ‘o e cloud (fa‘unga tauhi fakamatala fakakomipiutá)
‘I hono ‘ai ke mahinó, ko e ngāue fakakomipiuta ‘aki ‘a e cloud ko hono fakahoko atu ia ‘o ha ngaahi sēvesi fakakomipiuta, hangē ko e tauhi ‘o e fakamatalá mo e polokalama fakakomipiutá, ‘i he ‘initanetí ("the cloud").
‘I he Kāinga Ora, ‘oku mau tauhi mo ngāue ki he ngaahi fakamatala ‘e ni‘ihi ‘i he ngaahi peletifoomu ngāue ‘o e cloud ‘oku ‘i tu‘a mei Nu‘u Sila, kau ai ‘a e Microsoft Azure (peletifoomu ngāue fakakomipiuta), Microsoft 365 (polokalama fakakomipiuta ki he lavame‘a fakangāué) mo e Snowflake (tauhi‘anga mo e feitu‘u ngāue ki he fakamatalá). ‘Oku ‘uhinga eni ko e fakamatala ‘oku mau tauhi fekau‘aki mo koé ‘e ala tuku atu ia, pe vakai ki ai mei tu‘a ‘i Nu‘u Sila.
‘Oku mau fakahoko ‘a e ngaahi sitepu fakapotopoto kotoa pē ke fakapapau‘i ko e fakamatala fekau‘aki mo koé ‘oku tauhi pe fai ha ngāue ki ai ‘e he ‘emau kau ngāue fakafofonga mei tu‘á ‘oku malu mo hao meí he molé, ngāue‘aki mo fakahaa‘i ta‘e‘iai ha ngofuá, ngaahi liliu, mole pe ko ha ngaahi ngāuehala‘aki kehe. ‘Oku mau ma‘u ha loto pau ‘iate kimautolu ‘oku a‘usia ‘e he ‘emau ngaahi kautaha fakahoko ngāué ‘a e ngaahi tu‘unga mā‘olunga ki hono malu‘i ‘o e fakamatalá, tatau ai pē pe ‘oku ‘i Nu‘u Sila pe ‘i tu‘a mei Nu‘u Sila.
‘Oku fai homau lelei tahá ke fakapapau‘i ‘oku tonu ‘a e fakamatala fakafo‘ituitui ‘oku mau tānakí, ngāue‘akí pe tuku atu ki tu‘á.
Ko e taimi ‘okú ke ‘omai ai ha fakamatala kiate kimautolu, pe ‘oku hangatonu mai pe fakafou mai ‘e hao fakafofonga, ‘e fakatonutonu leva ki ai ‘emau ngaahi lēkootí.
‘Okú ke ma‘u ‘a e totonu ke kole ke mau fakatonutonu ha ngaahi fehālaaki pe ngaahi me‘a ‘oku ‘ikai ke ma‘u ‘i he fakamatala ‘oku mau ma‘u fekau‘aki mo koé.
Te mau tauhi ho fakamatala fakafo‘ituitui ki he lōloa taha ‘e ala fiema‘u ke a‘usia ‘a e taumu‘a na‘a mau tānaki mai aí.
Kapau ‘e fakakau ho‘o fakamatala fakafo‘ituitui ko ha konga ‘o ho‘o lekooti Kāinga Ora, te mau tauhi ‘a e fakamatalá ‘o fakatatau mo e Lao ki he Lekooti ‘a e Kakai 2005 (Public Records Act 2005).
‘I he taimi ‘e ‘ikai ai toe fiema‘u ke mau tauhi ho‘o fakamatala fakafo‘ituituí, te mau faka‘auha ia ‘i ha founga malu, ‘o fakatatau ki he ‘emau lao Records Retention and Disposal Policy.
‘Oku mau ngāue‘aki ‘a e fakamatala fakafo‘utuitui ‘oku mau tānaki mai meiate koé ke fakahoko ‘aki homau ngaahi ngafa fakalaó mo e ngaahi fatongia faka‘ahó. Te mau ala ngāue‘aki ho‘o fakamatala fakafo‘ituituí ki he ngaahi taumu‘a kau ai hono:
- fakapapau‘i ho ‘ilo‘i‘angá
- fakahoko atu kiate koe ‘emau ngaahi sēvesí, hangē ko hono ‘oatu ‘a e ngaahi fale ‘oku fe‘unga ki he kakai ‘oku ‘i he Lēsisita Fale Nofo‘anga ki he Fa‘ahinga ‘oku Mā‘ulalo ‘Enau Tu‘unga Fakapa‘angá, fokotu‘u mo fakahoko ha aleapau nofo totongi, pe ngāue ki ha tohi kole ki ha ngaahi tokoni fakapa‘anga ki he ma‘u ‘apí
- fakalelei‘i ‘emau ngaahi sēvesí, hangē ko e mahino‘i ‘a e ngaahi faka‘amu ‘emau kau kasitomaá lolotonga ‘enau ngāue‘aki ‘emau ngaahi uepisaití mo hono fakalakalaka‘i ‘a e a‘usia ko iá
- ngaahi taumu‘a ‘o e analaiso fakasitetisitika mo e fekumi, koloa pē ke ‘oua na‘a pulusi ‘a e olá ‘i ha fa‘ahinga founga ‘e lava ke ‘ilo‘i mei ai koe.
‘I he taimi te mau fiema‘u ai pe faka‘amu ke ngāue‘aki ho‘o fakamatala fakafo‘ituituí ‘i ha founga fo‘ou pe kehe, te mau fakahoko pē ia ‘i ha‘o fakangofua pe ‘i he taimi ‘oku fiema‘u ai pe fakangofua ‘e he laó.
‘E ‘ikai ke mau fakahaa‘i ho‘o fakamatala fakafo‘ituituí ki ha kautaha mei tu‘a ‘o te‘eki ai ma‘u ki ai ‘a ho‘o fakangofuá, tuku kehe ‘a e taimi ‘oku fiema‘u ai mo fakangofua ‘e he laó, kau ai ‘a e ngaahi tūkunga ‘a ia ko hono fakahaa‘i ‘a e taha ko e ngaahi taumu‘a na‘a mau ‘omai ai ‘a e fakamatalá. Ko e fakatātaá, te mau ala fakahaa‘i atu ho‘o fakamatala fakafo‘ituituí:
- ki he ‘emau ngaahi hoa ngāue ki he monomonó mo e fefakatau‘akí ke faka‘atā kinautolu ke fakahoko ‘a e ngāue monomono ki ho ‘apí, hangē ko ho fakaikiiki ki he fetu‘utakí, ko e palopalema ‘oku fiema‘u ke ngaahí pea kapau ‘oku ‘i ai ha kulī ‘i he ‘apí
- ki he ngaahi kautaha ‘uhilá ke fokotu‘utu‘u ha fakahoko ‘uhila mo hono fakahoko atu ‘o e ngaahi ngāue tefito ‘i ho ‘apí
- ‘i he taimi ‘okú ke tohi kole ai pe ko e Kāinga Ora ki he Fakamaau‘anga ki he Nofo Totongí (‘oku fakakaukaua kotoa ‘e he Fakamaau‘anga ki he Nofo Totongí ‘a e ngaahi faka‘eke ‘i he vaha‘a ‘o e kau lenilootí, kau ai ‘a e Kāinga Ora, mo e kau nofo totongí)
- ki he MSD ka e lava ke nau fakahoko honau fatongia ko ha kautaha fakafofonga ki he fale nofo‘angá ki he fa‘ahinga ‘oku mā‘ulalo ‘enau tu‘unga fakapa‘angá
- ki he ngaahi kautaha fakapule‘anga kehé. ‘Oku kau ki heni ka e ‘ikai fakangatangata ki ai ‘a e:
- New Zealand Police
- Potungāue Fakamaau‘angá
- Potungāue Pilisoné
- Potungāue Mo‘ui.
- ki he Statistics New Zealand ki he ngaahi taumu‘a fakasitetisitika ‘i he malumalu ‘o e lao Data and Statistics Act 2022
- ki he ngaahi kautaha ‘oku nau tokanga‘i ‘a e houtamaki ‘i he familí ‘i he malumalu ‘o e Lao ki he Houtamaki ‘i he Fāmilí 2018 pe ki he ngaahi kautaha ‘oku nau tokanga‘i mo malu‘i ‘a e tu‘unga lelei ‘o e mo‘ui ‘a e fānaú ‘i he malumalu ‘o e Lao Oranga Tamariki 1989
- ‘i he taimi ‘oku fiema‘u aí ki hano fakatotolo‘i ‘o ha ngaahi hia, pe ‘oku ‘i ai ha uesia lahi ki he mo‘ui leleí pe malú. Kapau ‘e fakamanamana‘i pe pā‘usi‘i ‘emau kau ngaué, ‘e lava ke mau ‘ave ‘eni ki he kau Polisí pea ‘oange mo e fakamatala ‘oku fekau‘aki mo e me‘á ni.
‘Oku fiema‘u ‘a e fakamatala fakafo‘ituituí ke vakai‘i ‘aki ho‘o tohi kolé mo ho‘o tu‘unga fe‘ungamālie ke ngāue ‘i he Kāinga Ora. ‘E tauhi ia, ngāue‘aki mo fakahaa‘i pē ‘o fakatatau ki he lao Privacy Act 2020 and Public Records Act 2005.
Ko e fakamatala kotoa te ke ‘omai ‘i ho‘o tohi kolé ‘e tauhi ia ke fakapulipuli ‘e he Kāinga Ora pea ngāue‘aki pē ia ki he taumu‘a na‘e ‘omai ki aí. Kapau ‘e ola lelei ho‘o tohi kolé, ‘e tauhi ‘a e fakamatala ko iá ‘i ho‘o faile fakafo‘ituituí pea ngāue‘aki ia ki he ngaahi taumu‘a ‘o ho‘o ngāue mo kimautolú.
Aotal Ltd (SnapHire)
‘I he taimi ‘okú ke tohi kole ai ki ha fatongia ‘i he Kāinga Ora, te ke fakahū ho‘o tohi kolé ‘o fakafou ‘i he Aotal Ltd (Snaphire), ‘a ia ko ha fa‘unga fakahū kau ngāue ia ‘oku fakahoko ‘i he ‘initanetí. Sio ki he founga ‘oku mapule‘i ‘aki ‘e he Aotal Ltd(external link) ho‘o fakamatala fakafo‘ituituí.
‘I he konga ‘o ‘emau tukupā ke ‘oatu ha sēvesi lelei ki he kau kasitomaá, ko e ngaahi fetu‘utaki telefoni kotoa ki he ‘emau Senitā Tokoni ki he Kasitomaá (call-centre) ‘oku hiki tepi ia.
‘Oku mau hiki tepi ‘a e ngaahi fetu‘utaki telefoní:
- ki he ngaahi taumu‘a ‘o hono ako‘i ‘a e kau ngāué
- ke fakalelei‘i ‘a e tu‘unga lelei ‘o ‘emau sēvesi ki he kasitomaá
- ke fakapapau‘i ‘oku mau ma‘u ha lēkooti tonu ‘o ho‘o fetu‘utaki telefoni maí.
Ko ‘emau ngaahi fetu‘utaki telefoní ‘oku tauhi ia ‘i ha vaha‘a taimi ko e māhina ‘e 12 pea ‘e faka‘auha leva ia ‘i ha founga malu.
Ko hono kole ke ma‘u atu ho‘o fetu‘utaki telefoní
‘Oku ‘i ai ho‘o totonu ke ke kole ke sio ki ai, pea fakatonutonu ha fa‘ahinga fakamatala fakafo‘ituitui ‘oku mau tauhi fekau‘aki mo koe. Sio ki he Requesting your personal information (Kole ke ma‘u atu ho‘o fakamatala fakafo‘ituituí) ke ‘ilo ‘a e founga te ke lava ai ‘o kole ha tatau ‘o hono hiki tepi ‘a ho‘o fetu‘utaki telefoni maí.
Cookies
‘Oku mau faka‘aonga‘i ‘a e cookies ke fakalelei‘i ai ‘a ho‘o a‘usia ‘i he ‘emau ngaahi uepisaití. Ko e cookies ko ha fanga ki‘i faile tohi (text) iiki ‘oku tauhi ‘e ho‘o me‘angāue faka‘ilekitulōniká (device) ‘i he taimi ‘oku ke ‘a‘ahi ai ki he lahi taha ‘o e ngaahi uepisaití. ‘Oku ‘ikai tānaki ‘e he cookies ‘a e fakamatala fakafo‘ituitui ka ko e fakamatala ‘oku ne fakalelei‘i ‘a e tu‘unga ‘aongá mo faka‘atā ‘a e fakamāketi fakapatonu ‘o e ngaahi koloa mo e sēvesi ‘o makatu‘unga ‘i he fiema‘u ‘a e kau ‘a‘ahí. Te ke lava ‘o ta‘ofi pe fakama‘a kinautolu meí he fai‘anga fekumi ‘i he ‘initanetí (web browser) ‘o ‘ikai uesia ai ‘a ho‘o lava ‘o faka‘aonga‘i ‘a e peesí ni.
Ngaahi Sitetisitika ‘i he Uepisaití
‘Oku fakahū ‘a e Google Analytics ki he ‘emau uepisaití, ‘a ia ko ha me‘angāue ki hono ‘analaiso ‘o e ‘initanetí. ‘Oku lēkooti ‘e he Google Analytics ‘a e ngaahi fakamatala ko ení ‘i he taimi ‘okú ke ‘a‘ahi ai ki he‘emau uepisaití:
- ko e browser (hangē ko e Chrome) mo e polokalama fakakomipiuta (operating system) (hangē ko e Windows XP) ‘okú ke faka‘aonga‘í
- ko e tu‘unga ‘ata lelei (screen resolution) ‘o ho‘o komipiutá
- ko e taimi mo e ‘aho ‘okú ke ‘a‘ahi ai ki he‘emau uepisaití
- ko e ngaahi peesi ‘okú ke ‘a‘ahi ki aí mo e ngaahi faile ‘okú ke tukuhifó (download)
- ko e tu‘asila ‘initaneti ‘okú ke hū mei ai ki he‘emau uepisaití (ko e tu‘asila IP)
- ko e ngaahi fo‘i lea fekumi ‘okú ke faka‘aonga‘i ki hono kumi ‘o ha kano‘i me‘a
- ko e uepisaiti fakamuimui taha na‘á ke ‘a‘ahi ki aí kimu‘a peá ke ha‘u ki he‘emau uepisaití
‘Oku tauhi ‘a e fakamatala ko ‘ení ‘i ha tauhi‘anga (server) ‘a e Google. Ko e kau ngāue pē kuo ‘osi fakamafai‘i ‘i he‘emau kautahá te nau lava ‘o ma‘u ‘a e fakamatalá.
Lēsisita ki he ngaahi fetu‘utaki ‘īmeili ‘a e Kāinga Ora
‘I he taimi te ke lēsisita ai ki ha taha ‘o ‘emau ngaahi tohi fanongonongó pe ‘īmeilí, ko e ngaahi fakaikiiki ‘okú ke ‘omaí ‘oku tauhi malu ia.
‘I hono ‘omai ho fakamatalá, ‘okú ke ‘omai ai ‘a ho‘o fakangofua ke ma‘u atu ‘a e ngaahi ‘īmeili meiate kimautolu, ‘o hangē ko ia kuo fakangofua ‘e he Lao ki he Ngaahi Fekau Faka‘ilekitulōnika Te‘eki Ke Ma‘u Ki Ai Ha Fakangofuá (Unsolicited Electronic Messages Act) 2007(external link).
Te ke lava ‘o ta‘ofi ‘a ho‘o lēsisitá (unsubscribe) ‘i ha fa‘ahinga taimi pē pea ‘e to‘o keva ho ngaahi fakaikiikí meí he lisi ‘īmeilí.
‘Oku ‘i ai ho‘o totonu ke ke sio ki ha fa‘ahinga fakamatala fakafo‘ituitui ‘oku mau tauhi fekau‘aki mo koé. Ke malu‘i ‘a e tu‘unga malu ho‘o fakamatalá pe ko e malu ‘a e fakamatala ‘a e ni‘ihi kehé, ‘e fiema‘u nai ke mau ‘uluaki fakapapau‘i pe ko hai koe. Te ke lava foki ‘o ma‘u atu ha fakamatala ‘i ha taimi pē ‘i hono ngāue‘aki ‘a e MyKāingaOra.
Te mau tali atu ‘a ho‘o kole fakamatalá ‘i loto ‘i he ‘aho ngāue ‘e 20 mei hono ma‘u mai iá. Te mau fakahoko atu ke ke ‘ilo kapau ‘oku mau fiema‘u ha taimi lahi ange ke ‘oatu ai ha tali. Kapau ‘e ‘ikai te mau tali ho‘o kole ke ‘atā ki he fakamatalá, te mau fakahā atu ‘i ha tohi mo fakamatala‘i atu ‘a e ngaahi ‘uhinga ‘o e ‘ikai ke talí mo fokotu‘utu‘u ha toe ngaahi sitepu te ke lava ‘o hoko atu ki ai.
‘E lava ke ke kole ke fakatonutonu ho‘o fakamatala fakafo‘ituituí ‘o fakafou ‘i ha taha ‘o e ngaahi halanga fetu‘utaki ko ení:
- Telefoni mai ‘i he 0800 801 601
- Fakafonu ‘emau foomu Enquiries and Feedback (Ngaahi fehu‘í mo e Fakakaukau Ke Tokoní)
- Talanoa pe ‘īmeili ki ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá
- ‘A‘ahi atu ki homau ngaahi ‘ōfisi Kāinga Ora ‘i ha fa‘ahinga taimi pē ‘i he vaha‘a ‘o e 9 pongipongi mo e 4 efiafi, Mōnite ki he Falaite
- Faitohi ki he Kāinga Ora – Homes and Communities, PO Box 2628, Wellington 6140
- ‘Īmeili privacyofficer@kaingaora.govt.nz
Te ke toe lava foki ‘o fai ha kole ‘o ngāue‘aki ‘a e me‘angāue Request My Info Tool ‘oku tuku atu ‘e he Office of the Privacy Commissioner (‘Ōfisi ‘o e Komisiona ki he Tauhi Malu ‘o e Fakamatalá) ‘i he ‘enau uepisaití: Office of the Privacy Commissioner | AboutMe (Request My Info Tool)(external link)
‘Okú ke ma‘u ‘a e totonu ke kole ke fakatonutonu ha fakamatala kapau ‘okú ke fakakaukau ‘oku hala. Te mau vakai‘i pea tali atu ‘a ho‘o kole fakamatalá ‘i loto ‘i he ‘aho ngāue ‘e 20 mei hono ma‘u mai iá. Te mau vakai‘i ho‘o kolé pea ‘e liliu ‘a e fakamatala ‘oku kau ki aí pe talaatu ‘a e ‘uhinga ‘oku mau pehē ai ‘oku ‘ikai totonu ke liliu ‘a e fakamatalá. Kapau ‘e ‘ikai te mau liliu ‘a e fakamatalá, ‘oku kei ‘i ai pē ho‘o totonu ke tānaki mai ha‘o fakamatala ki he fakatonutonú pea te mau fokotu‘u ‘a ho‘o kole liliú ‘i ho lekootí.
Ke malu‘i ‘a e tu‘unga malu ho‘o fakamatalá pe ko e malu ‘a e fakamatala ‘a e ni‘ihi kehé, ‘e fiema‘u nai ke mau ‘uluaki fakapapau‘i pe ko hai koe.
‘E lava ke ke kole ke fakatonutonu ho‘o fakamatala fakafo‘ituituí fakafou ‘i ha taha ‘o e ngaahi halanga fetu‘utaki ko ení:
- Fakafonu ‘emau foomu Enquiries and Feedback (Ngaahi fehu‘í mo e Fakakaukau Ke Tokoní).
- ‘Īmeili ki ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá
- Faitohi ki he Kāinga Ora – Homes and Communities, PO Box 2628, Wellington 6140.
- ‘Īmeili privacyofficer@kaingaora.govt.nz
‘I he Kāinga Ora, ‘oku mau tukupā ke ngāue mo tauhi ho fakamatala fakafo‘ituituí ‘aki ‘a e tokanga mo e faka‘apa‘apa. Kapau ‘okú ke tui ‘oku te‘eki ai ke mau fakahoko eni, ‘oku lava ke ke ‘omai ha‘o lau pe fai ha lāunga.
Ko hono fai mai ha lāunga kiate kimautolu
‘Oku lava ke ke fai ha lāunga fakafou ‘i he ngaahi halanga fetu‘utaki ko ení:
- Telefoni mai ‘i he 0800 801 601
- Fakafonu ‘emau foomu Enquiries and Feedback (Ngaahi Faka‘eke‘eké mo e Fakakaukau Ke Tokoní). Fili pē ‘a e ‘Complaint‘ (Lāunga) ‘i he malumalu ‘o e ‘Type of enquiry‘
- Talanoa pe ‘īmeili ki ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá pe ko ‘enau Pulé
- ‘A‘ahi atu ki homau ngaahi ‘ōfisi Kāinga Ora ‘i ha fa‘ahinga taimi pē ‘i he vaha‘a ‘o e 9 pongipongi mo e 4 efiafi, Mōnite ki he Falaite
- Faitohi ki he Kāinga Ora – Homes and Communities, PO Box 2628, Wellington 6140.
Ko hono fai ha lāunga ki he ‘emau Privacy Officer (‘Ōfisa ki he Tauhi Malu ‘o e Fakamatalá)
Kapau ‘okú ke loto ke fai ha lāunga ‘i he malumalu ‘o e lao Privacy Act 2020, te ke lava ‘o fetu‘utaki mai ki he ‘emau ‘Ōfisa ki he Tauhi Malu ‘o e Fakamatalá:
Privacy Officer
Kāinga Ora – Homes and Communities
PO Box 2628
Wellington 6140
‘Īmeili: privacyofficer@kaingaora.govt.nz
Ko hono fai ha lāunga ki he Privacy Commissioner (Komisiona ki he Tauhi Malu ‘o e Fakamatalá)
Kapau ‘oku ‘ikai te ke fiemālie ki he‘emau tali ki he me‘a ‘okú ke hoha‘a ki aí, ‘e lava ke ke fetu‘utaki ki he Komisiona ki he Tauhi Malu ‘o e Fakamatalá:
Officer of the Privacy Commissioner
PO Box 10094
Wellington 6143
Telefoni 0800 803 909
Fax 04 474 7590
‘Īmeili: enquiries@privacy.org.nz
Kapau te ke fili ke fai ha lāunga ki ha sino ‘i tu‘a pe ki ha pule faitu‘utu‘uni ‘o hangē ko e ‘Omipatimeni (Ombudsman) pe ‘ofisi ‘o e Komisiona ki he Malu ‘a e Fakamatala Fakafo‘ituituí, ‘e toki ala lava ai ke mau vahevahe atu ho fakamatalá mo kinautolu ‘i ha konga ‘o ‘enau ngaahi faka‘eke‘eké.
Kuo fakafo‘ou ‘a e peesí: 13 Nōvema 2023