Ngaahi Nō Kāinga Whenua ma‘á e fa‘ahinga taautahá
‘Oku ngāue fakataha ‘a e Kāinga Ora mo e Kiwibank ke tokoni‘i ‘a e kakai Maulí ke a‘usia ‘a e tu‘unga ma‘u ‘api ‘i honau kelekele ‘oku kaungā ma‘u tokolahí, ‘o fakafou ‘i he polokalama nō Kāinga Whenua.
Kapau ‘oku ke ma‘u ha totonu ke nofo ‘i ha kelekele Mauli ‘oku kaungā ma‘u tokolahi (lava ‘o ma‘u ha ngofua ke nofo ai), ‘oku faka‘atā koe ‘e ha nō Kāinga Whenua ma‘á e fa‘ahinga taautahá ke ke langa, fakatau pe hiki ha ‘api ‘i he kelekele ko iá. ‘E toe lava foki ke ngāue‘aki ‘a e noó ki hano monomono pe fakalelei‘i ha fale ‘oku ‘osi tu‘u (existing house) ‘i ha kelekele ‘oku kaungā ma‘u tokolahi.
‘Oku tali mo ‘oatu ‘e he Kiwibank ‘a e noó, pea ‘e fiema‘u ke ke ma‘u ‘a ‘enau ngaahi makatu‘unga ki ha noó pea pehē foki ki he ngaahi makatu‘unga ‘a e Kāinga Whenua. ‘E fakamo‘oni ‘a e Kāinga Ora ‘i he noó ma‘á e Kiwibank. Ko ha nō Kāinga Whenua ‘oku malu‘i ‘aki pē ia ‘a e falé, kae ‘ikai ‘aki ‘a e falé mo e kelekelé hangē ko ia ko e ngaahi nō fakatau ‘api kehé.
‘I ha Nō Kāinga Whenua ma‘á e fa‘ahinga taautahá, ‘e lava ‘e he Kiwibank ‘o ‘oatu ha nō ‘oku a‘u ki he $500,000 ki he mahu‘inga ‘o e langa pe fakatau ‘o e falé, ‘o fakatu‘unga ‘i ha ngaahi makatu‘unga pau. ‘Oku kau ki he ngaahi makatu‘unga ko ení ‘a ho‘o ngofua ke nofo ‘i he konga kelekelé, ko ha fakamahu‘inga mei ha tokotaha fakamahu‘inga ‘api kuo lēsisita pea mo ha aleapau langa ‘oku fakafiemālie.
‘Oku ‘ikai ke fiema‘u ha tipōsiti ia ki ha nō ‘oku si‘isi‘i hifo ‘i he $200,000, ka ‘oku fiema‘u ha tipōsiti 15% ki he pa‘anga kotoa pē ‘oku noo‘i mai ‘oku laka hake ‘i he $200,000. Ko e fakatātaá, ko ha nō $400,000 ‘e fiema‘u ki ai ha tipōsiti $30,000.
‘Oku ‘atā atu pē ‘a e Nō Kāinga Whenua ki ha kakai ‘oku ‘ikai ‘i ai ha‘anau toe ma‘u‘anga pa‘anga kehe ke fai ‘aki ‘a e langá, hiki atu ha fale ki ha feitu‘u fo‘ou pe fakatau ‘i he ‘enau kelekele Mauli ‘oku kaungā ma‘u tokolahí.
‘Oku ou ‘atā atu ki ha nō Kāinga Whenua?
Ke ‘atā atu ki ha nō Kāinga Whenua ma‘á e fa‘ahinga taautahá, ‘e fiema‘u ke ke ma‘u kotoa ‘a e ngaahi makatu‘unga ko ení:
-
‘e fiema‘u ‘a e konga kelekelé ko ha kelekele Mauli ia ‘oku ‘ikai ke lava ‘o mōkisi (kau ai ha kelekele ‘oku ma‘u mai mei he iwi pe hapu ko ha konga ‘o e alea ‘i he malumalu ‘o e Talité) pea ‘oku ma‘u ‘e he kau ma‘u ‘api tokolahi pe ‘oku ma‘u ‘e he kau talāsiti ‘o ha kautaha ‘a e totonu kakato ki he kelekelé ‘a ia na‘e fokotu‘u ‘i he malumalu ‘o e lao Te Ture Whenua Māori Act 1993
-
lava ‘o ma‘u ha laiseni ke nofo ‘i he konga kelekele ‘okú ke faka‘amu ke langa aí
-
‘e fiema‘u ki ha tokotaha ‘i he kau noó ke nofo taimi kakato/tu‘uma‘u ‘i he falé (‘a ia ‘oku ‘ikai ko e taumu‘á ke nofo totongi pe ngāue‘aki ko ha ‘api nofo‘anga ki he taimi mālōloó)
-
‘e fiema‘u ke ke ‘omai ha fakamo‘oni fakafiemālie ‘o e pa‘anga hū maí ki he Kiwibank
-
‘okú ke ma‘u ha lēkooti fakamo‘ua lelei ‘a ia ‘oku tali ‘e he Kiwibank.
Ko e hā ‘a e me‘a te u lava ‘o langa/hiki ki ha feitu‘u fo‘oú ‘aki ha nō Kāinga Whenua?
Ko ha nō Kāinga Whenua ‘oku ‘i ai ha ngaahi makatu‘unga pau ki he fale ‘okú ke fakakaukau ke langá, fakataú pe hiki atu ki he konga kelekelé.
Ko e ngaahi makatu‘unga ‘o ha nō Kāinga Whenua ‘oku fiema‘u ai ‘a e falé ke:
-
langa ‘i ha ngaahi fakava‘e mālohi
-
fungavaka taha ‘o ‘ikai toe si‘isi‘i hifo ‘i he sikuea mita ‘e 50
-
faingamālie ‘a e a‘u ki ai meí he hala pule‘angá
-
ke tu‘u ia ‘i he fonua lahi ‘i he ongo motu Noaté pe Sauté.
Kapau ‘oku ‘i ai ha‘o ngaahi fehu‘i fekau‘aki mo e Polokalama Nō Kāinga Whenua fetu‘utaki mai ‘i he vaha‘a ‘o e 8 pongipongi mo e 5 efiafi ‘i he: 0508 WELCOME (0508 935 266).
Kapau te ke lava ‘o ma‘u kotoa ‘a e ngaahi makatu‘unga ki he ‘atā atu ki aí, ‘oku ‘i ai ha sitepu ‘e 11 ‘oku fiema‘u ke ke fakakakato.
Fakatokanga‘i ange ‘e malava ke hoko eni ko ha fo‘i ngāue lōloa tupu mei he tu‘unga fihi ‘oku kaunga ki hono ma‘u ‘o ha ngofua ke nofo ‘i ha kelekele Maulí ‘oku kaungā ma‘u tokolahi.
Sitepu 1. Fili ke nofo ‘i ho‘omou kelekele Mauli ‘oku kaungā ma‘u tokolahí
Fakakaukaua ‘a e tu‘unga ki he ngaahi lelei, ala ola tamaki, mo e fakamole ‘i hono ma‘u ha ‘api ‘i ha kelekele Mauli ‘oku kaungā ma‘u tokolahi.
Sitepu 2. Tohi kole ki ha tomu‘a tali ‘o ha nō Kāinga Whenua
‘E lava ‘e he Kiwibank ‘o vakai‘i ho tu‘unga ‘atā atu ko ia ki ha nō Kāinga Whenua pea talaatu ‘a e lahi ‘o e pa‘anga te ke malava ‘o noó.
Sitepu 3. Kole ‘a e poupou ‘a e kau ma‘u ‘api kehe ‘o e konga kelekelé
Ke ‘atā atu ki ha nō Kāinga Whenua te ke fiema‘u ‘a e poupou ‘a e kau ma‘u ‘api kehé pe kau talāsití kimu‘a ke ke fakamoleki ha taimi pe pa‘anga. ‘I hono tali ‘a e noó, ‘e fiema‘u ki he kau ma‘u ‘api/talāsiti kehé ke fakamo‘oni ‘i he Aleapau Kāinga Whenua (Land Tenure and Security Interest) (sio ki he Sitepu 7).
Sitepu 4. Tisaini ho ‘apí
‘Oku fiema‘u ke ke tisaini ho ‘apí ‘o fakatatau ki he ngaahi makatu‘unga ‘o e nō Kāinga Whenua (sio ki he ‘Ko e hā te u lava ‘o langa/fakahiki fo‘ou ‘aki ha nō Kāinga Whenua‘ ‘i ‘olunga).
Sitepu 5. Kumi ha tokotaha langa pea fokotu‘u ha patiseti mo e palani
‘E fiema‘u ke ma‘u ‘e ho‘o patisetí ‘a e ngaahi makatu‘unga ki ha nō ‘a e Kiwibank. ‘E toe fiema‘u foki ke ke ma‘u mai ‘a e ngaahi fakangofua kotoa ‘a e kōsilió ‘oku fiema‘ú, ke ke talangofua ai ki he ngaahi lao fakakoló.
Sitepu 6. Ma‘u mai ‘a e tu‘utu‘uni ki he tali ‘a e noó mei he Kiwibank
Kapau ‘oku a‘usia ‘e ho‘o tohi kolé ‘a e ngaahi makatu‘unga ‘a e Kāinga Whenua ki he ‘atā atu ki aí, mo e ngaahi makatu‘unga ki ha nō ‘a e Kiwibank, ‘e tali ‘e he Kiwibank ‘a e noó.
Sitepu 7. Fakamo‘oni ‘i he Aleapau Kāinga Whenua (Land Tenure and Security Interest)
‘Oku fa‘u ‘a e Aleapau Kāinga Whenua (Land Tenure and Security Interest) ‘aki ‘a e laiseni ke nofo aí konga 3 peesi 9 (kau ki ai ha laiseni ke langa ‘i he konga kelekelé) mo e tohi fakamo‘oni ki he totonu ki ha koloá ‘o e mōkisí. ‘E fiema‘u ke ke fakamo‘oni ai ‘a koe, ko e kau ma‘u ‘apí mo e Kāinga Ora. Fakatokanga‘i: ko e tohi ko ení ko ha fakamo‘oni pea ‘e fakakakato pē ia ‘e he Kāinga Ora – Home and Communities hili ‘emau ma‘u mai ‘a e ngaahi me‘a fakapepa faka‘osi ‘o e noó mei he Kiwibank. ‘E ‘ave leva ia ki he kau Fakafofonga Laó ke fakamo‘oni kotoa mai ki ai ‘a e ngaahi fa‘ahi ‘oku kau maí.
Sitepu 8. Lēsisita ‘i he Māori Land Court (Fakamaau‘anga ki he Kelekele ‘o e Kakai Maulí)
‘E fiema‘u ke lēsisita ‘e he Māori Land Court ho‘o laiseni ke nofo aí.
Sitepu 9. Kamata ‘a e langá
Ko e langa ‘o ha fale, fakalelei‘i pe hiki ha fale ‘oku ‘osi tu‘u ki ha feitu‘u ‘e taha, ‘oku kamata ia fakatatau ki he tisainí, palaní, mo e patiseti naá ke fakahū atu ko e konga ‘o ho‘o tohi kolé.
Sitepu 10. Toho fakakongokonga ‘o e noó fakatatau ki he hokohoko ‘a e langá
Ko e taimi mo e ngaahi fakaikiiki iiki taha ki hono toho fakakongokonga ‘o e noó fakatatau ki he fakahokohoko ‘o e langá ‘e kehekehe pē ia ki he ngaahi nō Kāinga Whenua kotoa.
Sitepu 11: Kakato ‘o e langá
‘I he‘ene kakato ‘a e langá ‘e malava leva ke ke hiki ki ai. Talamonū atu, kuó ke ma‘u ho fale pē ‘o‘ou ‘i ho kelekele Mauli ‘oku kaungā ma‘u tokolahí.
‘Oku mau ‘i heni ke tokoni
Ko e langa ‘i ha kelekele ‘o e kakai Maulí ‘oku kaungā ma‘u tokolahí ‘e lava ke hoko ia ko ha ngāue lōloa mo faingata‘a. Koe‘uhi ko e me‘á ni, ‘oku ‘i heni ai ‘a e Kāinga Ora ke tokoni‘i koe lolotonga ‘a e ngāue ki aí.
Ke ‘ilo‘i pe ‘okú ke ‘atā atu ki ha Nō Kāinga Whenua, telefoni ki he Kiwibank ‘i he 0800 272 278.
Kuo fakafo‘ou ‘a e peesí: 19 Mē 2022