Ngaahi Fale Lelei ki he Mo‘ui Leleí ‘a e Kāinga Ora

‘Oku mapule‘i pē ‘e he ngaahi ‘api o ‘ení honau fua māfaná fakafou ‘i he fa‘unga poto, faka‘aonga‘i ‘o e ngaahi nāunau langa tu‘unga mā‘olunga, mo ha sisitemi ki he fehū‘aki ‘a e ‘eá ‘oku ne tānaki ‘a e ‘ea māfaná .

Ki he ‘emau kau kasitomaá, ‘oku ‘uhinga ‘a e nofo ko ia ‘i he Fale Lelei ki he Mo‘ui Leleí ki ha ma‘u‘ang ivi ‘oku ‘ikai fakamole, ‘ea fo‘ou mo lelei ‘i loto fale mo e ngaahi fua māfana fakafiemālie mo fakatupu mo‘ui lelei ‘i he kotoa ‘o e ta‘ú. Ki he ‘ātakaí, ‘oku ‘uhinga ia ‘oku mau tuku atu ‘a e ngaahi ‘api tu‘unga mā‘olunga ‘oku holoki lahi ai ‘a e ngaahi kasa kāponí.

‘Oku fu‘u kei fo‘ou ki Nu‘u Sila ‘a e fakakaukau ko ia ki he Fale Lelei ki he Mo‘ui Leleí, pea ‘e fiema‘u ha timi fa‘ufa‘u mataotao ke a‘usia ‘a e tu‘unga lelei ki he Fale Lelei ki he Mo‘ui Leleí pe tu‘unga lelei tatau.

Ngaahi nāunau ‘o e Fale Lelei ki he Mo‘ui Leleí

Langa ‘ahi‘ahi ‘o e Fale Lelei ki he Mo‘ui Leleí

‘Oku mau fiefia ke tataki ‘a e founga langa ‘oku si‘isi‘i ange ai ‘a e kāponí ko ha fakatātā ‘i he ‘emau langa fakalakalaka Bader Ventura. Ko e Bader Ventura ‘a e fuofua langa ‘ahi‘ahi ki he langa fakalakalaka ‘o e Fale Lelei ki he Mo‘ui Leleí ma‘á e Kāinga Ora mo e mu‘aki ia ‘i he ‘ene Polokalama ki he Ngaahi Fale ‘Oku ‘Ikai Ke Nau Tukuange Ha Kāponí. ‘Oku toe lele lelei foki ‘a e polōsekí ke tuku atu ‘a e fuofua Fale Lelei ki he Mo‘ui Leleí ‘i he vāhenga Australasia ‘i hono fakapa‘anga ‘e he pule‘anga fakafonuá. 

Tataki ‘o e tafa‘aki fakaengāué

‘I he tu‘unga ko hano ‘ahi‘ahi ‘o e ngaahi founga fo‘oú, ‘oku fakataumu‘a ‘a e Bader Ventura ke mahino‘i ‘a e ngaahi lelei ‘o e Ngaahi Fale Lelei ki he Mo‘ui Leleí pea tokoni ke fakatupulekina ‘a e mafai fakaengāue ‘i he ngaahi langa ‘oku si‘isi‘i ai ‘a e ngaahi nāunau kāponí. ‘Oku lahi ‘a e ngaahi ola lelei ‘e ala ma‘u ki he tu‘unga lelei ‘o e mo‘uí ma‘á e kau kasitomā ‘o e ngaahi fale ma‘á e kakaí ‘oku fai ‘a e vakai ki aí, pea ki he Kāinga Ora ‘i he tu‘unga ko e kautaha tokonaki fale lahi taha ‘i he fonuá, ko ha sitepu lahi eni ki hono tokoni‘i ‘a e a‘usia ‘o e ngaahi taumu‘a ‘a e sekitoá ki he feliliuaki ‘a e ‘eá.

‘I he māhina ‘e 12 hoko maí, ‘e fua ai ‘e he Kāinga Ora ‘a e tu‘unga lelei ‘o e ngaahi ‘api ko ení ke sio pe ‘oku hā mai ‘a e ngaahi lelei na‘e fakafuofua‘í. ‘Oku ‘uhinga eni ko hono fua ‘a e fua māfana mo e hauhau ‘o e ‘ea ‘i loto-falé, tu‘unga lelei ‘o e ‘eá, vai mafaná mo e lahi ‘o e ‘uhila ‘oku faka‘aonga‘í. ‘Oku mātu‘aki mahu‘inga ‘a e fakamatala ko ení ki hono ‘oatu ha fakamatala ki he ngaahi tu‘unga ‘o e langá ‘a e Kāinga Ora ki he kaha‘ú, pea mo hono fakalelei‘i ‘a e ‘ilo mo e mafai fakaengāue ‘a e sekitoá fakalūkufua.

Founga fakangofua ki he Fale Lelei ki he Mo‘ui Leleí

1. ‘Oku ‘uhinga ‘a hono ma‘u atu ‘o ha fakangofua ki hono fa‘ufa‘u ‘o ha Fale Lelei ki he Mo‘ui Leleí ke kamata ‘a e langá makatu‘unga ‘i ha fo‘i palani kuo ‘osi fakangofua.
2. Fakahoko ‘o e ngaahi sivi mo e fua ‘i he feitu‘u ‘oku fai ai ‘a e langá. ‘Oku sivi tu‘o ua ‘i ha konga kehekehe ‘o e langá ‘a e tu‘unga malu ‘o e matapaá pea faka‘atá mo e sisitemi ki he fehū‘aki ‘a e ‘eá (sivi mo fakalelei‘i). Ko e ngaahi konga tefito ‘o e founga ngāue ki ha langá ‘oku lēkooti fakalelei ia ‘aki ha ngaahi lau‘i tā mo e ngaahi me‘a fakapepa ke poupou‘i. 
3. ‘Oku vakai‘i ‘e he tokotaha fakangofuá ‘a e kotoa ‘o e ngaahi me‘a fakapepá ‘o fakatatau ki he tu‘unga ‘oku fiema‘u ki he Fale Lelei ki he Mo‘uí Leleí ke fakamo‘oni‘i na‘e langa ‘a e falé ‘o fakatatau ki he palaní pea mo a‘usia ‘a hono ngaahi tāketi ki he tu‘unga leleí, pea kapau kuo kakato ia, ‘e tuku atu leva hono fakamafaí.

Nāunau tokoní

• Ko ha mape ‘o e Ngaahi Fale Lelei ki he Mo‘ui Lelei kuo Fakangofua ‘i Nu‘u Silá, mo e ngaahi ‘api ‘oku lolotonga fai e ngāue ki hono Fakangofuá: sustainableengineering.co.nz/nz-au-certified-passive-house-projects-map/(external link)