Ngaahi ‘a‘ahí mo e hū‘angá

Ko e kotoa ‘o e ngaahi ‘api Kāinga Ora ‘oku sivi‘i tu‘o taha ia ‘i he ta‘u ke vakai‘i ‘a e ngaahi me‘a hangē ko e ngaahi me‘a fakatokanga kohú mo fakapapau‘i ‘oku ngāue lelei ‘a e me‘a kotoa. Te mau ala ‘a‘ahi atu kiate koe ‘i ha ngaahi taimi kehe ‘o ka fiema‘u, pea ‘oku ne toe ‘oatu ai ha faingamālie ke talamai ai ‘a e ngaahi me‘a ‘oku fiema‘u ke ngaahí/fakalelei‘í.

Kimu‘a ke ke hiki maí, te mau ‘a‘ahi atu ki ho ‘apí pea ‘oatu ha Property Condition Report (līpooti ki he tu‘unga ‘oku ‘i ai ‘a e ‘apí) ke ke fakamo‘oni ai.

Ko e hā ‘a e lōloa ‘a e ngaahi ‘a‘ahí?

‘Oku angamaheni ke miniti ‘e 40 nai ha ‘a‘ahi. Te mau vakai‘i pe:

• ‘oku a‘usia ‘e he tu‘unga ho ‘apí ‘emau ngaahi tu‘unga ki he fakaleleí
• ‘oku a‘usia ‘e he ‘apí ‘a e ngaahi tu‘utu‘uni ‘i he lao Building Act mo e malu mei he velá
• ‘oku fokotu‘u ‘a e ngaahi fakatokanga kohú pea ‘oku ngāue
• ‘oku ke fakahoko ho ngaahi fatongia ko ha tokotaha nofo totongi
• ‘oku mau fakahoko homau ngaahi fatongiá ko ha lenilooti.

Fakatokanga kimu‘a ke mau ‘a‘ahi atú

Te mau fakahoko atu ke ke ‘ilo ki ai ‘o fakafou ‘i ha tohi ‘i he houa ‘e 48 kimu‘a ke mau a‘u atu ke ‘a‘ahi atu ki ho ‘apí. Kapau ‘oku ‘ikai ko ha taimi lelei ia kiate koe, kātaki ‘o fakahoko mai ia ‘aki ha‘o fetu‘utaki ki he 0800 801 601 pea te mau fokotu‘utu‘u ha toe taimi ‘e taha.

Ko hai ‘oku fiema‘u ke ‘i ‘apí

‘E fiema‘u ke ‘i ai ha tokotaha lahi ‘i ‘api ki he ‘a‘ahi fakata‘ú  - ko e lelei tahá kapau ko e tokotaha na‘e fakamo‘oni ‘i he aleapau ki he nofo totongí. Kapau ‘oku ‘ikai ke malava ia, te ke lava ‘o fokotu‘utu‘u ke ‘i ai ha tokotaha lahi ko ha‘o kaungāme‘a pe fāmili.

Ko hai oku ne fakahoko ‘a e ‘a‘ahi fakata‘ú?

Ko ha tokotaha ngāue Kāinga Ora pe ko ha kautaha faisivi ‘api. Ko e kau faisivi kotoa ‘e fiema‘u ke nau fakahāhā atu honau ‘ilo‘angá (ID). Kapau ‘oku ‘ikai ke ‘i ai ha‘anau ‘ilo‘anga, kole ange ke nau tatali ‘i tu‘a pea fetu‘utaki mai kiate kimautolu ‘i he vave tahá ‘i he 0800 801 601.