Nō Kāinga Whenua - ma‘á e ngaahi talāsiti ki he kelekele ‘a e kakai Maulí

‘Oku ‘atā atu ‘a e ngaahi noó ki he fa‘ahinga taautahá pea kuo toe fakaa‘u atu ia ki he ngaahi talāsiti ki he kelekele ‘a e kakai Maulí mo e ngaahi kulupu kehé. ‘Oku toe kau foki ki ai ‘a e kelekele ‘oku ma‘u mai ‘e he iwi moe hapu ko e konga ‘o e ngaahi alea ‘i he malumalu ‘o e Talité.

‘Oku kaungā fakahoko atu ‘e he Kāinga Ora mo e Kiwibank ‘a e Polokalama Nō Kāinga Whenua ki he ngaahi talāsiti ki he kelekele ‘o e kakai Maulí moe ngaahi kulupu kehé.

Ko hono lēsisita ho‘o fie kau maí

Kapau ko ha talāsiti kimoutolu ki he kelekele ‘o e kakai Maulí pe ko ha kulupu kehe ko e sitepu ‘uluakí ko e lēsisita ho‘omou fie kau ki aí ‘i he tohi kole ki ha noó ‘aki ‘a hono fakafonu ‘a e foomu Registration of Interest (ROI) [PDF, 36 KB].

Ko hono fakafonu ‘o e foomu ROI ‘oku ‘ikai ko ha tohi kole faka‘ofisiale ia. ‘Okú ne faka‘atā kimautolu ke mau vakai‘i pea mahino‘i ho‘omou palaní, fakahoko hano fuofua sivisivi‘i homou faingamālie ke kau maí mei homou tu‘unga fakapa‘angá pea fakapapau‘i ‘oku ngāue lelei ‘aki ‘e ho‘omou tohi kolé ha faingamālie ‘i ha fa‘ahinga liliu kimui mai ‘i he ngaahi tu‘utu‘uní.

‘I he taimi ‘e paasi ai ho‘o fokotu‘u ki ha langa fale nofo‘angá ‘i hono fuofua sivi‘i ko ení, ‘e hoko atu leva ia ki he founga ngāue faka‘ofisiale ki he tohi kolé mo e Kiwibank.

Ko e lahi te ke ala noó

‘I he Kāinga Whenua te ke lava ‘o nō ‘o a‘u hake ki he $500,000 ki he fale takitaha ‘oku teu ke langá. Ko e lahi ‘o e nō ‘e talí ‘e fiema‘u ke fakakau ki ai ha fo‘i mahu‘inga talifaki ko e 10% - pe 5% kapau ‘e ‘omai ha Master Build Guarantee (aleapau ‘okú ne malu‘i ‘a e ngaahi fakamole ‘e ala hoko ‘i ha langa). ‘E ngāue‘aki ‘a e ngaahi tu‘unga totongi tupu ‘i he māketí ki he noó.

‘Oku malu‘i ‘e he Kāinga Ora ‘a e nō ki he falé ‘aki ha aleapau tafa‘aki ‘e ua ‘i he vaha‘a ‘o e talāsití mo e Kāinga Ora.

‘Oku fiema‘u ki he ngaahi falé ke ala lava ‘o to‘o mei hono tu‘u‘angá kapau ‘e fiema‘u.

‘I hono fakakakato ‘o e ROI ‘e fiema‘u ke ke ‘omai ha tatau ‘o e ngaahi ‘akauni ‘a e talāsití na‘e ‘ātita‘i fakamuimui taha kimuí ni maí mo e fakaikiiki ‘o ho‘o polōseki langa falé ‘o kau ki ai ‘a e:

• lahi ‘o e ngaahi fale ke langá
• ko e fakamole kuo fika‘í
• te ke fakapa‘anga fēfē ‘a e langá
• ko ho‘o ngaahi palani ki hono ma‘u ‘o e ngaahi ‘apí 
• kautaha fakalao ‘okú ‘a‘ana ‘a e konga kelekelé.

Ke lēsisita ha fie kau mai ‘i ha Nō Kainga Whenua ki he ngaahi talāsiti ki he kelekele ‘o e kakai Maulí:

Tukuhifo (download) ha tatau PDF ‘o e  foomú pea ‘īmeili ia ki he kaingawhenua@kaingaora.govt.nz;

Pe lī ‘i he meilí ki he:

Kāinga Whenua Loans
Kāinga Ora - Homes and Communities
PO Box 2628
Wellington 6140