Faasilasilaga Tulaga e lē Faalauaiteleina
O lo o faamatalaina i le faasilasilaga tulaga e lē faalauaiteleina faiga e teu ma vaaia ai e le Kāinga Ora – Homes and Communities faamatalaga e patino ia te oe.
E te iloa ai auala matou te aoina mai ai, teuina, ma faaaogaina ai faapea tulaga e ono faailoa atu ai faamatalaga patino ia te oe; o le faiga e mafai ona e maua ma faasa‘o ai faamatalaga nei; ma le auala e mafai ona e faia ai se faaseā i tulaga e lē faalauaiteleina.
Upu Tomua
Matou te faataunuuina le tele o matafaioi autu, e ausia ai le tofa mamao o le Fau o fale sili ona mananaia e soifua ma ola ai tagata. Matafaioi autu:
- o se pulega e vaaia fale o nofoia e tagata lautele
- o se pulega mo le atinaega o taulaga ma fau fale e nofoia e le mamalu o le atunuu, e gafatia na totogi ma fale mo fefaatauaiga faamaketi, ma
- e pulea polokalame a le malo e fesoasoani i tagata ia mafai ona umia se fale ma polokalame fai.
E iai taimi e moomia ai ma faaaoga faamatalaga patino ia te oe, ina ia mafai ona faatino matafaioi autu.
E faalagolago ituaiga faamatalaga matou te aoina mai i tulaga o la tatou va fetausiai ma auaunaga o matou saunia, ae mafai ona aofia faamatalaga nei i faamatalaga patino:
- pepa faamaonia o lou tagata moni, e pei o se kopi o lau tusifolau Niu Sila, pepa fanau, po o se faamaoniga o le nofomau pe afai e lē o oe o se sitiseni Niu Sila
- lou igoa
- aso fanau
- lou tuatusi
- lau numera e faafesootai atu ai ma le tuatusi imeli
- tagata o tou nonofo faatasi
- o au fagafao
- tulaga o le fale lena o e mautotogi ai
- faamatalaga teugatupe faletupe, e pei o tupe totogi e toesea sa‘o mai teugatupe
- faamatalaga pule o le galuega, e mafai ai ona toesea sa‘o tupe totogi mai lau tupe maua o totogi
- tulaga o lau galuega, faamaoniga o tupe maua ma isi faamatalaga tau tupe, e pei o faamatalaga saofaga KiwiSaver.
E aoina mai faamatalaga patino i luga o tiute faatulafonoina ma saunia ai auaunaga mo oe.
E aofia ai le:
- faamaoniaina o oe
- faafesootai atu ai
- faatulaga vaega tonu e mafai ona matou fesoasoani atu ai
- faamautinoa o faafoeina lau mautotogi e tusa ai ma le Residential Tenancies Act 1986 ma le Public and Community Housing Act 1992, ma le
- faamautinoa o tulaga tau tupe ua matou saunia o lo o faafoeina i se tulaga e tusa ai ma tulafono talafeagai.
E te tuuina sa‘o mai faamatalaga e patino ia te oe pe a tatou fesootai. E tele auala tatou te fesootai ai, e aofia ai pe a:
- tatou talanoa i luga o le telefoni, ona matou faia lea o se faamatalaga tusia o le valaau po o le pu‘e o le talanoaga
- tatou feiloai i se ofisa Kāinga Ora po o lou fale
- fesootai i se imeli, feau tusitusia po o faiga faainitaneti, e tuuina mai ai manatu tusia
- faatumu ai se pepa mo faamatalaga o moomia e le Kāinga Ora (i luga o le initaneti po o se kopi e lolomi i se laupepa)
- lesitala ma faaaogā ai faamaumauga i le MyKāingaOra
- lesitala e imeli atu ai lipoti lata mai.
E masani ona matou aoina sa‘o mai ia te oe faamatalaga e patino ia te oe.
Peitai, matou te ono aoina mai faamatalaga patino ia te oe mai isi tagata ma matagaluega, pe afai ua e malie matou te talosagaina mai isi o fai ma ou sui po o isi matagaluega.
E ono faaaoga le malosi o le tulafono e mafai ai ona matou aoina mai faamatalaga mai isi matagaluega a le malo.
Mo se faataitaiga, pe afai o oe o se tagata nofo mautotogi, matou te aoina mai faamatalaga patino mai se pulega o fale mo tagata e maualalo tupe maua – le Ministry of Social Development (MSD) – i lalo o le Public and Community Housing Act 1992.
O le pule faitalia a le MSD e iloa ai tagata e agavaa mo se fale mo tagata lautele ma tuuina mai faamatalaga patino ia te oe ma tagata o tou nonofo faatasi e mafai ai ona faataunuu matou matafaioi ua avea ai ma auaunaga e saunia fale mo tagata e maualalo tupe maua, e iloilo ai le tele o fale mo tagata lautele o avanoa ma saili ai se fale sili ona talafeagai mo oe ma tulaga e agavaa ai.
E tuuina mai e le MSD faamatalaga e aofia ai:
- tulaga moomia o se fale
- ituaiga ma le nofoaga e maua ai se fale e fetaui mo oe ma lou aiga
- faamatalaga talafeagai i tulaga e gafatia ai se mautotogi, ma le
- vaevaeina o le Income Related Rent mo oe ma lou aiga.
Matou te faia ma tausisia tulaga e malupuipuia ai faamatalaga ma faamaumauga e patino ia te oe. E vaavaaia, vailiili ma suesue e le suetusi matou faiga faavae.
E tatau i tagata faigaluega uma a le Kāinga Ora, paaga galuega faaleleia ma tomai faumea ona faatino galuega e tusa ai ma le Privacy Act 2020 pe a taulimaina faamatalaga patino ia te oe.
E faia aoaoga tau tomai o le aufaigaluega e mautinoa ai o taulimaina ma le faaeteete ma vaai lelei faamatalaga patino ia te oe.
Faaaogaina o faiga vaoteatea
A tuu i se faaupuga faigofie, o faiga faakomepiuta tau vaoteatea, e pei o faiga e teu ai ma polokalame, o mea e faaaoga ai le initaneti (“le vaoteatea”).
E teu ma faagaioia e le Kāinga Ora, nisi o faamatalaga i faiga tau vaoteatea i fafo atu ma Niu Sila, e aofia ai le Microsoft Azure (faiga faakomepiuta), Microsoft 365 (polokalame faagaioia ai le aogā) ma le Snowflake (nofoaga faamauina ma faagaioia ai). O lona uiga e ono siitia faamatalaga e patino ia te oe i fafo atu, po o le maua mai, fafo atu o Niu Sila.
Matou te faia tulaga talafeagai uma e faamautinoa ai o faamatalaga patino ia te oe o faamauina po o faagaioia e isi, o lo o puipuia mai tulaga e leiloa ai, tulaga e maua ma faailoa atu ai e aunoa ma se faatagana, suia, leiloa po o le faaaoga sese. Ua faamalieina i matou e tusa ma puipuiga maualuga o faamaumauga o faaaoga e faalapotopotoga o saunia auaunaga ma oloa, i totonu po o fafo atu ma Niu Sila.
O le a matou taumafai i tulaga uma e mafai ai ia mautinoa le sa‘o o faamatalaga patino ua matou aoina, faaaogāina ma faailoa.
O taimi uma e te tuuina mai ai faamatalaga ia i matou, pe tuuina sa‘o mai pe auala mai isi o fai ma ou sui, o le taimi lava lea e faafou ai faamaumauga o lo o matou umia.
E iai lau aiatatau e te talosaga ai mo ni faasa‘oga po o mea e lei aofia i faamatalaga o matou umia e faatatau ia te oe.
Matou te teuina faamatalaga e patino ia te oe i le umi e talafeagai ai mo le ausia o matafaioi e tatau ona matou aoina ai.
Afai e avea faamatalaga e patino ia te oe ma vaega o faamaumauga a le Kāinga Ora, o faamatalaga nei o le a matou teuina e tusa ai ma le Public Records Act 2005.
E tausisia tulaga o le taiala faavae Records Retention and Disposal Policy e tiai lelei ai faamatalaga patino ua lē toe moomia ona matou teuina.
Matou te faaaogaina faamatalaga patino na e tuuina mai e tusa ai ma le tulafono, mo galuega fai i aso uma. O nisi nei o tulaga e mafai ona matou faaaoga i ai faamatalaga patino ia te oe:
- faamaonia ai lou tagata moni
- saunia ai auaunaga mo oe, e pei o le saunia o fale e talafeagai mo tagata o faamauina i le Social Housing Register, faagaioia ma saunia ai se maliega mautotogi, po o le faagasolo ai o se talosaga mo se oloa o se fale umia
- faaleleia ai matou auaunaga, e pei o le malamalama i mea tonu o moomia e tagata o faaaogaina matou auaunaga pe a faaaoga matou upegatafailagi ma faaleleia ai le iloa
- auiliiliina o faamaumauga faafuainumera ma suesuega, ma e faia le tulaga lea i se auala e lē mafai ai ona iloa oe mai faasalalauga ua faia.
E lē mafai ona faaaoga i tulaga o moomia ai po o se isi lava faiga po o auala fou, e aunoa ma lau faatagana po o tulaga e faatagaina e le tulafono.
Matou te lē faailoa faamatalaga patino i isi e aunoa ma sau faatagana, se‘i vagana pe afai o se tulaga e tatau ai po o tulaga e faataga ai e le tulafono, e aofia ai ma tulaga o le fia maua mai o isi faamatalaga. Mo se faataitaiga, e mafai ona faailoa atu faamatalaga patino ia te oe:
- e mafai ai e paaga fai galuega faaleleia ma tomai faumea ona faatino galuega faaleleia i lou fale, e pei o faamatalaga e faafesootai atu ai, o le faaletonu ua moomia na toe faaleleia ma iloa ai pe iai se taifau i le fale
- e mafai ai e auaunaga tau suavai, eletise ma fesootaiga ona faaola ma faagaioia auaunaga autu i lou fale
- o tulaga ua e tuuina atu ai pe tuuina atu foi e le Kāinga Ora se talosaga i le Tenancy Tribunal (e iloiloina e le Tenancy Tribunal feteenaiga uma i le va o ē ona fale, e aofia ai ma Kāinga Ora, ma tagata nofo mautotogi)
- e mafai ai e le MSD ona faagaioia tiute ua avea ai ma pulega o fale mo tagata e maualalo tupe maua
- i isi matagaluega a le malo. E aofia ai matagaluega nei ae e lē gata i ai:
- New Zealand Police
- Ministry of Justice
- Department of Corrections
- Ministry of Health.
- Statistics New Zealand mo galuega faafuainumera e faia i lalo o le Data and Statistics Act 2022
- i isi matagaluega e feagai ma sauaga i totonu o aiga i lalo o le Family Violence Act 2018 po o isi matagaluega e nafa ma le tausiga ma le puipuiga o tamaiti i lalo o le Oranga Tamariki Act 1989
- pe a talafeagai ai mo le suesueina o ni soligatulafono, po o tulaga taufaamata‘u e ono lamatia ai le soifua maloloina po o le saogalemu. Afai e faamata‘u pe sauaina la matou aufaigaluega, o tulaga nei e ono faailoa i le Ofisa o Leoleo ma faailoa ai faamatalaga talafeagai.
E tatau ona maua faamatalaga patino e iloilo ai lau talosaga ma le agavaa mo se avanoa faigaluega i le Kāinga Ora. E taofia, faaaoga ma faailoa faamatalaga nei e tusa ai ma le Privacy Act 2020 ma le Public Records Act 2005.
E tausisia e Kāinga Ora agatapuia o faamatalaga uma na e tuuina mai i lau talosaga ma faatoa faaaoga lava mo le auga tonu na fia maua ai. Afai ua faamanuiaina lau talosaga, ona faamauina faatasi lea i lau faila ma e faaaoga mo tulaga ua matou faafaigaluegaina ai oe.
Aotal Ltd (SnapHire)
A e talosaga mai mo se galuega i le Kāinga Ora, e auala atu i le Aotal Ltd (SnapHIre) lau talosaga, o se faiga faainitaneti e faagaioia talosaga mo avanoa faigaluega. Tagai i le faiga e puleaina ai e le Aotal Ltd(external link) faamatalaga patino.
O le tasi o itu e faaleleia ai auaunaga sili mo tagata, e pu‘e ai e le Ofisa Lagolago (call-centre) tautalaga i luga o telefoni.
Matou te pu‘e le valaau mai:
- mo aoaoga tau tomai mo le aufaigaluega
- mo le faaleleia atili o auaunaga e tali atu ai i tagata
- e faamautinoa ai le sa‘o o faamatalaga o faamauina na e valaau mai ai.
E 12 masina le umi e teu ai tautalaga na pu‘e ona faatamaia lea.
Talosagaina o lau valaau mai
E i ai lau aiatatau e talosaga ai le fia maua, ma le faia o faasa‘oga o faamatalaga patino ia te oe o matou taofia. Tagai i le vaega Talosagaina o faamatalaga patino ia te oe e te iloa ai le faiga e talosaga ai mo se kopi o lau tautalaga i luga o le telefoni na pu‘e.
Cookies
Matou te faaaoga cookies e faaleleia ai tulaga e te faaaoga ai la matou upegatafailagi. E ta‘ua faamatalaga na e maua mai upegatafailagi ma faamauina i lau masini faatekonolosi o cookies. E lē aoina e le cookies faamatalaga e patino i le tagata tau lava o faamatalaga e faaleleia ai faiga o faagaioia ma faalauiloa oloa ma auaunaga e tusa ma mea o saili ma faitau i ai tagata. E mafai na e taofia le faiga lea po o le tapē ese mai le itulau na tatala e aunoa ma le afaina ai o lou maua o faamatalaga o le tafailagi na e sailia.
Faamaumauga Faafuainumera Tafailagi
O le Google Analytics, o se metotia e vailiiliina faamatalaga tau initaneti, ma o se vaega o a matou upegatafailagi. E faamaumauina i le Google Analytics faamatalaga o ta‘ua i lalo pe a e tatalaina matou tafailagi:
- itulau na tatala (e pei o le Chrome) ma le polokalame o faagaioia ai (e pei o le Windows XP) lena e te faaaogaina
- malosi o le malamalama o lau PC
- taimi ma le aso na e tatala ai la matou tafailagi
- itulau na e tatala ma faila na e kopia
- tuatusi o le initaneti na e maua ai la matou tafailagi (tuatusi o le IP)
- faaupuga na e faaaoga e suesue ai se mataupu
- tafailagi mulimuli na e tatalaina a o lei oo lau suesue i la matou tafailagi.
O faamatalaga nei e teu i le Google. Na o le aufaigaluega aloaiaina o la matou pulega e mafai na maua faamatalaga.
Faitau i le vaega security and privacy principles o ta‘ua i le Google Analytics(external link).
Lesitala mo le imeli atu o faamatalaga mai le Kāinga Ora
E teu malu faamatalaga auiliili na e faailoa mai i lau lesitala mo le fia maua o talafou tusia po o imeli.
O lou tuuina mai o faamatalaga ua e malie ai foi e imeli atu, e pei ona faatonuina i le Unsolicited Electronic Messages Act 2007(external link).
O le a aveese lou igoa mai le lisi o meli e lafo atu, i soo se taimi lava ua e taofia ai lau lesitala.
E i ai lau aiatatau e talosaga ai le fia maua o faamatalaga patino ia te oe o matou taofia. E ono moomia le faamaonia muamua o lou tagata moni, e puipuia ai tulaga e patino ia te oe faapena ma isi. E mafai foi ona e maua nisi o faamatalaga i soo se taimi e faaaogā ai le MyKāingaOra.
E 20 aso faigaluega e maua atu ai se tali o lau talosaga talu mai le aso na maua ai. E toe fesootai atu pe afai e moomia se taimi faaopoopo e tali atu ai. Afai matou te teena se talosaga e fia maua ai faamatalaga, o le a matou faailoa atu le tulaga lea i se tusi ma faailoa atu mafuaaga ua teena ai ma faataatia isi laasaga e mafai ona e uia.
Tagai i auala o ta‘ua i lalo e maua ai faamatalaga e patino ia te oe:
- Valaau mai i le 0800 801 601
- Faatumu faamatalaga o le Faafesili ma Pepa faatumu o manatu faaalia
- Talanoa pe imeli lau Housing Support Manager
- E tatala ofisa Kāinga Ora i le mamalu o le atunuu mai le 9am i le 4pm, Aso Gafua i le Aso Faraile
- Lafo se tusi i le Kāinga Ora – Homes and Communities, PO Box 2628, Wellington 6140
- Imeli privacyofficer@kaingaora.govt.nz
E mafai foi ona e faaaoga le Request My Info Tool e maua i le upegatafailagi a le Privacy Commissioner e fai ai lau talosaga: Office of the Privacy Commissioner | AboutMe (Request My Info Tool)(external link)
E i ai lau aiatatau e talosaga ai le faasa‘o o faamatalaga e te manatu e sese. E 20 aso faigaluega e faagaioia ai lau talosaga ma maua atu ai se tali talu mai le aso na maua ai le talosaga. E lua tulaga e mafai ona tali atu ai, o le suia o faamatalaga talafeagai, po o le faamatala o mafuaaga ua matou manatu e lē tatau ai ona suia faamatalaga. Afai matou te lē faasa‘oa faamatalaga, e iai pea lava lau aiatatau e fai ai sau faamatalaga e faasa‘o ai ma faapipii i lau talosaga, ma o le a matou faamauina suiga na e talosagaina i lau faila.
E ono moomia le faamaonia muamua o lou tagata moni, e puipuia ai tulaga e patino ia te oe faapena ma isi.
Tagai i auala o ta‘ua i lalo e mafai ona e talosaga i ai mo se faasa‘oga o faamatalaga e patino ia te oe:
- Faatumu faamatalaga o le Faafesili ma Pepa faatumu o manatu faaalia
- Imeli lau Housing Support Manager
- Lafo se tusi i le Kāinga Ora – Homes and Communities, PO Box 2628, Wellington 6140
- Imeli privacyofficer@kaingaora.govt.nz
E folafola atu e Kāinga Ora le taulimaina ma le faaeteete ma le ava e tatau ai o faamatalaga e patino ia te oe. Faaali mai sou manatu i le tulaga lea po o le faia o se faaseā, pe afai matou te lē o tausisia lea tulaga.
Tuuina mai o se faaseā
O nisi nei o auala e mafai ona faaoo mai ai sau faaseā:
- Valaau mai i le 0800 801 601
- Faatumu faamatalaga o le Faafesili ma Pepa faatumu o manatu faaalia. Na o le filifili le vaega ‘Faaseā’ i lalo o le ‘Ituaiga faafesili’
- Talanoa pe imeli lau Housing Support Manager po o lana Taitai
- E tatala ofisa Kāinga Ora i le mamalu o le atunuu mai le 9am i le 4pm, Aso Gafua i le Aso Faraile
- Lafo se tusi i le Kāinga Ora – Homes and Communities, PO Box 2628, Wellington 6140.
Tuuina atu o se faaseā i le Privacy Officer
A e fia faia se faaseā i lalo o le Privacy Act 2020, ona faafesootai lea o le:
Privacy Officer
Kāinga Ora – Homes and Communities
PO Box 2628
Wellington 6140
Imeli: privacyofficer@kaingaora.govt.nz
Tuuina atu o se faaseā i le Privacy Commissioner
Afai e te lē o malie i se tali atu mai le Privacy Officer e tusa ai ma se atugaluga na e faaalia, ona tuuina atu lea o se faaseā i le Privacy Commissioner:
Officer of the Privacy Commissioner
PO Box 10094
Wellington 6143
Telefoni 0800 803 909
Fax 04 474 7590
Imeli: enquiries@privacy.org.nz
A e filifili e tuuina atu lau faaseā i se isi faalapotopotoga po o se pulega e pei o Ofisa a le Privacy Commissioner po o le Ombudsman, ona e iloa lea e ono faailoa i ai faamatalaga e patino ia te oe e tusa ma faafesili mai pulega nei.
Uma na faafou le itulau: 13 November 2023