Te Tahua Whakaterenga Hanganga
Te whakatakoto i te tūāpapa mō ngā hapori me ngā takiwā noho hou puta noa i Aotearoa.
I whakarewahia te Tahua Whakaterenga Hanganga (IAF) i te Hune 2021. He tata ki te $1 piriona te nui o te tahua hei tautoko i ngā tūāhanga hou, nunui rānei ka whakahoutia – pērā i ngā rori, ngā wai e toru me te whakahaere waipuke – kia taea ai te hanga kāinga hou i ngā wāhi e nui te hiahia ki ngā whare noho.
Ka whakahaerehia e Kāinga Ora, he mea hanga te IAF hei āwhina kia tere ake, kia nui ake te whakaratonga o ngā whare noho mā te utu i ngā tūāhanga tino hira e hiahiatia ana mō ngā whanaketanga.
Kua kati ngā tono ki te IAF ināianei.
Ngā tohanga pūtea IAF
I tēnei wā, $926.7 miriona o ngā pūtea IAF kua tohaina ki ngā kaupapa tūāhanga tino hira i ngā tāonenui me ngā tāone 28 i Aotearoa. Huihui katoa, ko te tūmanako tata ki te 30,000 ki te 35,000 ngā kāinga hou ka whakamanahia mō ngā tāngata o Aotearoa i roto i te 10 ki te 15 tau e heke nei.
Kaikohe
- Kua whakaaetia te pūtea IAF: $23 miriona
- Ko te tikanga ka whakamanahia ngā kāinga hou: 365
Ka whakaterehia ake ngā whanaketanga whare i ngā wāhi e toru i Kaikohe mā te pūtea $23 miriona o te IAF, ā, ka whakamahia mō te whakahaere waipuke me ngā whakahoutanga nui ki te wai para me te wai marangai kia pai ake te kōtuinga onāianei me te whakarite ka taea te tipuranga anamata.
E tūmanakohia ana e Te Kaunihera o Te Tai Tokerau ki te Raki ka puta i te tūāhanga mai i te pūtea IAF ngā kāinga 365 hou i te takiwā, hei tuku arawātea e tino hiahiatia ana mō te whiwhi kāinga mō te mana whenua me te hapori whānui. Kei roto i ngā kāinga tūmatanui me te papakāinga i ngā putanga whare noho kei te whakaritea.
Kawakawa
- Kua whakaaetia te pūtea IAF: $25.6 miriona
- Ko te tikanga ka whakamanahia ngā kāinga hou: 310
Ka whiwhi tētahi mahi whakawhānui rori me ngā whakahoutanga nui ki te tūāhanga wai i Kawakawa, i Te Tai Tokerau i te $25.6 miriona mai i te IAF, kia taea ai ngā kāinga hou tino maha te hanga i te takiwā me te whakarite i te tino poto o ngā whare noho.
Hei tā Te Kaunihera o Te Tai Tokerau ki te Raki ko ngā kaupapa tūāhanga ka utua e te IAF tata ki te 300 kāinga hou ka taea te whakatū, tae atu ki ngā kāinga tata ki te 180 i roto i te whanaketanga Te Mataora e marohitia ana e whakaratoa ana e Ngā Kāingamaha o Ngāti Hine Charitable Trust. Ko ngā whakaritenga a te Tarahiti mō te whanaketanga ko ngā whaitua noho mō ngā kaumātua me ngā kāinga utu ngāwari, kia tipu ai he hapori me ōna reanga rerekē.
Whangārei
- Kua whakaaetia te pūtea IAF: $10.3 miriona
- Ko te tikanga ka whakamanahia ngā kāinga hou: 3,000
Ka tautokona ngā whakahoutanga tūnuku hira i Whangārei e te $10.3 miriona mai i te IAF. Ko ngā kaupapa kei te whiwhi pūtea ko tētahi piriti hou kei te tapatāone o Kamo, he āwhina kia nui ake te āhei atu me te whakatuwhera i tētahi wāhi whānui ake mō te whanaketanga whare noho. Ka whakakapi te piriti hou i tētahi piriti papa ara kotahi onāianei, ā, kua tārewa ngā mahere whanaketanga i tēnei wā. Ka whakamahia hoki ngā pūtea IAF mō tētahi takaāwhio hou i te Huarahi Matua Kotahi me tētahi rori i raro huanui me tētahi ara ngātahi, e tūhono ana i ngā wāhi whanaketanga kua whakaritea i Spring Flat me ngā ratonga, te mātauranga me ngā arawātea whai mahi.
E tūmanakohia ana ka tautokona e ngā kaupapa tūāhanga ka utua e te IAF te whakaratonga o ngā kāinga atu ki te 1,000 i roto i te 10 ki te 15 tau, ā, atu ki te 2,000 ngā kāinga tāpiri i te wā roa.
Tāmaki Makaurau (Mt Albert)
- Kua whakaaetia te pūtea IAF: $113.2 miriona
- Ko te tikanga ka whakamanahia ngā kāinga hou: 4,000
Ka utua e te haumitanga IAF o te $113.2 miriona ngā whakahoutanga tūāhanga i Carrington Road hei tautoko i te whanaketanga ā-tāone nunui i Pt Chevalier/Mt Albert, i Tāmaki Makaurau e arahina ana e ngā rōpū e toru o Tāmaki Makaurau.
E tūmanakohia ana ka tautokona e tēnei tūāhanga te whakaratonga o ngā kāinga 4,000 i te iti rawa i te whenua tata ki te 40 heketea.
Ka whakamahia te pūtea IAF hei whakawhānui i a Carrington Road me ngā whakahoutanga hāngai, ā, kei roto ko ngā ara pahi, ngā ara eke pahikara, ngā whakapaitanga ki te pūtahitanga, me ngā wāhi whakawhiti rori haumaru, i roto katoa i te ara o Carrington Road kua whakawhānuitia i tautuhia i roto i te Mahere Kotahitanga. Mā ngā otinga tūnuku i utua e te IAF ka taea hoki ngā whanaketanga anamata me te whakaapiapitanga i Mt Albert me ngā tapatāone paetata.
Tāmaki Makaurau (Ōrākei)
- Kua whakaaetia te pūtea IAF: $7.3 miriona
- Ko te tikanga ka whakamanahia ngā kāinga hou: 469
Ka tautoko te haumitanga IAF o te $7.3 miriona i ngā whare noho papakāinga atu anō kua whakaritea e tata ana ki te marae o Ōrākei i Tāmaki Makaurau, e whakaratoa ana e te hapū o Ngāti Whātua Ōrākei. Ka whakamahia ngā pūtea IAF hei whakahou ake i te pūtahitanga i waenga i Kupe Street me Kepa Road kia haumaru ake, ā, kia uru pai atu ki te papakāinga o Ōrākei, me te tautoko hoki i te whakatū whare atu anō ā tōna wā me te whakaapiapitanga i te takiwā o Ōrākei.
E tūmanakohia ana ka whakaterehia ake e te pūtea te whakaratonga o te tūāhanga e hiahiatia ana hei hanga i ngā kāinga tata ki te 460 i roto i ngā tau e heke nei, e tautoko ana i ngā wawata o Ngāti Whātua Ōrākei ki te hanga kāinga atu anō mō ngā whānau e noho tino tata ana ki te marae, e ū ai te wairua o te hapori.
Kirikiriroa
- Kua whakaaetia te pūtea IAF: $150.6 miriona
- Ko te tikanga ka whakamanahia ngā kāinga hou: 4,140
Kua herea te $150.6 miriona o te pūtea IAF hei tautoko i te whakaapiapitanga o te pokapū o te tāonenui o Kirikiriroa. Ka whakamahia ngā pūtea mō ngā kaupapa tūāhanga tino hira hei takawaenga whanaketanga atu anō i te takiwā – tae atu ki tētahi puna wai hou, teihana papu hoki, te whakahou me te whakapai ake i ngā wai o te rohe, me tētahi piriti mō te hīkoi me te eke pahikara e whakawhiti ana i te awa o Waikato, hei hono i ngā tapatāone o te taha rāwhiti ki te pokapū tāonenui.
Ko te tikanga ka tautoko ngā pūtea i ngā kāinga hou tata ki te 4,000, e tata ana ki ngā mahi, mātauranga, tūnuku hoki kia eke ki te hiahia o te 'tāonenui 20 meneti' e noho ai, e mahi ai, e tākaro ai te tangata i te wāhi katoa me te whakaiti i te hiahia ki te hāereere.
Ngāruawāhia
- Kua whakaaetia te pūtea IAF: $5.32 miriona
- Ko te tikanga ka whakamanahia ngā kāinga hou: 200
Ka whiwhi te takiwā o Galbraith Street i Ngāruawāhia i Waikato i te $5.32 miriona mō te tūāhanga wai e toru me te tūnuku. E tūmanakohia ana e te Kaunihera aa Takiwaa o Waikato tata ki te 200 ngā kāinga utu ngāwari hou, mākete hoki ka puta i tēnei e tino tata ana ki te pokapū tāone me ngā kura o te takiwā, me te tautoko hoki i te whakatū kāinga ki ngā whenua paetata.
Tauranga (Tauriko ki te Uru)
- Kua whakaaetia te pūtea IAF: $80 miriona
- Ko te tikanga ka whakamanahia ngā kāinga hou: 2,000
I te rohe o Te Moana-a-Toi e tere nei te tipu, $80 miriona kua tukuna e te IAF mō ngā whakahounga nui ki te tūnuku me te wai kia taea ai ngā whare noho i te wāhi tipuranga matua o te papa kākāriki o te Uru o Tauriko i Tauranga. E tūmanakohia ana e Te Kaunihera o Tauranga nā tēnei pūtea tata ki te 2,000 ngā kāinga hou ka taea, ā, kei roto pea ko ngā whare noho tūmatanui, utu ngāwari, mākete hoki.
Ko ngā whakahounga tūnuku i utua e te IAF ka whakanui ake i te tūhonohono ki te pokapū tāonenui me te Wāhi Pakihi o Tauriko, me te waihanga i tētahi kōtuinga wā roa hei tautoko i te tipuranga o te tāone i roto i te Western Corridor.
Tauranga (Te Papa)
- Kua whakaaetia te pūtea IAF: $67.9 miriona
- Ko te tikanga ka whakamanahia ngā kāinga hou: 1,600
Ka whai hua te Kūrae o Te Papa i Tauranga mai i te $67.9 miriona o te pūtea IAF, he mea tuku ki ngā whakahounga tūāhanga tino hira hei whakatū whare noho me te tautoko i te whakaapiapitanga i roto i te takiwā.
Ka tautoko te pūtea IAF i te Wāhanga Tuarua o te whakahounga o te ara o Cameron Road – he rori matua e rere ana i te pokapū o Te Kūrae o Te Papa me te tūhono atu ki ngā tapatāone o waho ki te pokapū tāonenui. Kei roto i ngā mahi kua whakaritea ko te waihanga i tētahi ara whānui hīkoi, eke pahikara me te tūnuku tūmatanui.
E tūmanakohia ana e Te Kaunihera o Tauranga mā te tūāhanga o te pūtea IAF, kei roto hoki ko ngā whakahounga tūnuku atu anō me te whakawhānui ake i te ratonga wai, 1,600 ngā kāinga hou ka taea i roto i ngā hapori tūhonohono me te toritori.
Rotorua
- Kua whakaaetia te pūtea IAF: $84.6 miriona
- Ko te tikanga ka whakamanahia ngā kāinga hou: 3,080
Tata ki te $85 miriona kua herea ki ngā rongoā wai marangai i ngā takiwā o Waenganui me te Uru o Rotorua, tae atu ki ngā whenua rāhui me ngā wāhi kākāriki tae noa ki ngā pūkaki o te Utuhina me Mangakākahi. Mā ngā āwhina a ngā hoa whanaketanga, e tūmanakohia ana e Te Kaunihera o Ngā Roto o Rotorua neke atu i te 3,000 ngā nohoanga ka taea e tēnei tūāhanga.
Ōmokoroa
- Kua whakaaetia te pūtea IAF: $38.4 miriona
- Ko te tikanga ka whakamanahia ngā kāinga hou: 2,580
Mā te haumitanga tata ki te $38.4 miriona ka utu i tētahi pūtahitanga hira i waenga i te Huarahi Matua 2 me Ōmokoroa Road, e haumaru ai te kuhu ki te kūrae o Ōmokoroa, ā, e taea ai te tipu e tūmanakohia ana mō te tāone i ngā tau 15 e heke nei.
Ko te tūmanako tata ki te 2,500 ngā kāinga ka taea e tēnei whakahounga, ā, hei hanga kāinga tū motuhake, utu ngāwari me te apiapi wawaenga.
Tūranganui-a-Kiwa
- Kua whakaaetia te pūtea IAF: $4.2 miriona
- Ko te tikanga ka whakamanahia ngā kāinga hou: 458
$4.2 miriona te haumitanga IAF ka puta ki te takiwā o Taruheru i Tūranganui-a-Kiwa i ngā kaupapa wai hira me ngā whakapainga rori. E tūmanakohia ana e Te Kaunihera o Tūranganui-a-Kiwa mā ēnei mahi ka taea ngā whare noho tūmatanui, utu ngāwari me te mākete, tae atu ki tētahi wāhi whare noho mō ngā whare o ngā mana whenua me tētahi pokapū oranga.
Heretaunga
- Kua whakaaetia te pūtea IAF: $18.5 miriona
- Ko te tikanga ka whakamanahia ngā kāinga hou: 4,000
Ka whakapai ake tētahi haumi o te $18.5 miriona i Heretaunga i te rori me te rongoā i ngā whakatiki raukaha i roto i te kōtuinga wai para o te takiwā. He tono ngātahi tēnei i waenga i Te Kaunihera o Heretaunga me te Heretaunga Tamatea Settlement Trust. E whakapono ana te Kaunihera tata ki te 4,000 ngā kāinga hou ka taea e te pūtea IAF puta noa i ngā whanaketanga maha, tae atu ki ngā whare noho Māori i ngā whanaketanga papakāinga maha.
Waipukurau
- Kua whakaaetia te pūtea IAF: $10.9 miriona
- Ko te tikanga ka whakamanahia ngā kāinga hou: 950
$10.9 miriona i te Central Hawkes Bay District Council, hei utu i ngā tūāhanga tino hira kia wātea ai he whenua mō ngā whare noho hou i roto i te Takiwā Tipuranga o te Tonga o Waipukurau. E whakapono ana te Kaunihera ka taea e te pūtea nei ngā kāinga atu ki te 950 ka hangaia i roto i te Takiwā – e tautoko ana i te nuinga o te tipuranga ā-tāone e hiahiatia ana i roto i te takiwā.
Kei roto i ngā mahi tūāhanga ko ngā tūmomo whakapai ake tūnuku, ngā kiromita maha o ngā paipa hou mō te wai para me te ratonga wai, he puna wai hou, me ngā whakapai ake nui ki te wai marangai, ā, he hira ēnei mō te whakatutuki i te pūmanawa noho puku o te takiwā whanaketanga.
Ahuriri
- Kua whakaaetia te pūtea IAF: $12.4 miriona
- Ko te tikanga ka whakamanahia ngā kāinga hou: 400
Ka whiwhi a Maraenui i Ahuriri te $12.4 miriona mō ngā mahi whakahaerenga waipuke hira, ā, e whakapono ana Te Kaunihera o Ahuriri nā tēnei e 400 ngā kāinga hou atu anō ka taea e te kōtuinga, tae atu ki ngā whare tūmatanui, utu ngāwari hoki.
Ngāmotu
- Kua whakaaetia te pūtea IAF: $1.8 miriona
- Ko te tikanga ka whakamanahia ngā kāinga hou: 300
Ka kite ngā whanaketanga whare noho e ono i Ferndale, i Ngāmotu, i te haumi o te $1.8 miriona hei whakahou i te ratonga wai me te kōwhiringa tūnuku, ā, e whakapono ana Te Kaunihera o Ngāmotu atu ki te 300 ngā kāinga hou ka taea i roto i te wā roa, me ngā momo kōwhiringa tūnuku maha.
Whanganui
- Kua whakaaetia te pūtea IAF: $1.95 miriona
- Ko te tikanga ka whakamanahia ngā kāinga hou: 340
Ka whiwhi i te whakaroa i a Carson Street i te tapa tāone o Castlecliff i Whanganui te $1.95 miriona mō te tūāhanga tūnuku me ngā wai e toru hāngai. Ka whakaroahia atu e te tūāhanga te rori kia taea ai ngā kāinga atu ki te 340 atu anō i te takiwā, me ngā whakaritenga mō ngā whare tuku iho.
Pahīatua
- Kua whakaaetia te pūtea IAF: $880,000
- Ko te tikanga ka whakamanahia ngā kāinga hou: 30
Ka tautokona ngā mahere whanaketanga mō tētahi wāhi kura tawhito i te tāone o Pahīatua o Tararua e te $880,000 mai i te IAF, hei āwhina ki te hanga whare atu anō.
Ka whakamahia te pūtea AIF mō tētahi tūāhanga wai para hou, wai marangai me te wai māori, ā, e tūmanakohia ana e Te Kaunihera o Tararua 30 ngā kāinga hou i te iti rawa ka whakatūria i te wāhi whanaketanga o Rangitāne. E rikarika ana a Rangitāne ki te mahi ngātahi me te kaunihera me te kāwanatanga. Ko ngā papakāinga, ngā whare rēti, utu ngāwari hoki kei roto i ngā mahere e marohitia ana mō te whanaketanga.
Ōtaki
- Kua whakaaetia te pūtea IAF: $29.3 miriona
- Ko te tikanga ka whakamanahia ngā kāinga hou: 1,040
I te tāone o Ōtaki i Kāpiti, i taea e te tono ngātahi a ngā rangatira whenua Māori, te Kaunihera me ngā kaiwhakawhanake tūmataiti ngā pūtea IAF tata ki te $29.32 miriona hei whakahou i ngā tūāhanga wai e toru me te rori. E tūmanakohia ana neke atu i te 1,000 ngā kāinga papakāinga, utu ngāwari, mākete hoki.
Te Awakairangi
- Kua whakaaetia te pūtea IAF: $98.9 miriona
- Ko te tikanga ka whakamanahia ngā kāinga hou: 3,520
Ka whiwhi te kaupapa whakaapiapi o Riverlink me Valley Floor i Te Awakairangi i te $98.9 miriona mō te whakapai ake i te pūnaha wai marangai, tae atu ki ngā paipa wai marangai hou tata ki te rua kiromita, ngā teihana papu me ngā whakaputa. I roto i te urupare kōtuinga whānui ake, e whakapono ana Te Kaunihera o Te Awakairangi mā te tūāhanga ka taea te whanaketanga me te tuku raukaha mō ngā kāinga hou tata ki te 3,500.
Porirua
- Kua whakaaetia te pūtea IAF: $6.1 miriona
- Ko te tikanga ka whakamanahia ngā kāinga hou: 437
$6.1 miriona ngā pūtea IAF kua herea mō te whakahou tūnuku ki Tītahi Bay Road / Kenepuru Interchange me te whakahou i ngā wai e toru. E tūmanakohia ana ka puta i ēnei pūtea ngā nohoanga 437 atu anō ka hangaia i roto i te whanaketanga a Ngāti Toa Rangatira i te Taunga o Kenepuru.
Ōrongomai
- Kua whakaaetia te pūtea IAF: $12.4 miriona
- Ko te tikanga ka whakamanahia ngā kāinga hou: 859
Ka whiwhi i Te Kaunihera o Te Awakairangi ki Runga te $12.4 miriona mai i te IAF, ā, ka utua e tēnei ngā whakahou tūnuku tino hira i roto i te takiwā, ā, ka taea tētahi whanaketanga whare noho tino apiapi kua whakamaheretia i roto i te Papa Omaoma Hōiho o Trentham i Ōrongomai. E tūmanakohia ana ka puta i te tūāhanga hou ko te raukaha e hiahiatia ana hei tautoko i te whanaketanga, me te whakapiki hoki i te tū pakari o te kōtuinga tūnuku o Ōrongomai katoa.
E tūmanakohia ana ka āwhina te tūāhanga ka utua e te pūtea IAF ngā kāinga hou tata ki te 850 i roto i tētahi whanaketanga whakamahinga hanumi kei roto ko ngā whaitua noho, ngā kāinga tiaki kaumātua me ngā ratonga ora hapori.
Motueka
- Kua whakaaetia te pūtea IAF: $1.2 miriona
- Ko te tikanga ka whakamanahia ngā kāinga hou: 200
Ka tautokona te pūnaha wai para hou, te whakahou i te pūnaha wai marangai me tētahi takaāwhio hou i Motueka e te $1.2 miriona mai i te IAF. Ko te tikanga ka whakatere ake te pūtea i te whakaratonga o ngā whare hou tata ki te 200, ā, tērā pea he whare noho utu ngāwari, tūmatanui, papakāinga hoki.
Tāonenui o Whakatū
- Kua whakaaetia te pūtea IAF: $36.4 miriona
- Ko te tikanga ka whakamanahia ngā kāinga hou: 1,025
Tata ki te $36 miriona kua herea hei tautoko i te whakaapiapitanga o te tāonenui o Whakatū. Ka whakamahia te pūtea IAF mō te tūāhanga tūnuku me ngā wai e toru kia taea ai ngā kāinga hou tata ki te 1,000, ā, e tūmanako ana Te Kaunihera o Whakatū kia tekau whakareanga ake te maha o ngā kainoho ka uru mai ki te pokapū o te tāone.
Hokitika
- Kua whakaaetia te pūtea IAF: $3.5 miriona
- Ko te tikanga ka whakamanahia ngā kāinga hou: 110
Ka whakahohorotia ngā whakaritenga a Te Kāhui o Poutini ki te whakawhanake i tētahi wāhanga o te Papa Tauomaoma Hōiho o Hokitika mō ngā whare noho hou nā te $3.5 miriona mai i te pūtea IAF, ā, e tere ake ai te hanga i ngā kāinga ki tērā i whakaritea ai.
Ko te tūāhanga tūnuku me ngā wai e toru i utua e te IAF e matapaetia ana tata ki te 110 ngā kāinga hou ka whakatūria, ā, ko te tikanga pea ka nui ake ngā kāinga utu ngāwari, tūmatanui hoki mō te hunga pakeke ake.
Kawatiri
- Kua whakaaetia te pūtea IAF: $13.6 miriona
- Ko te tikanga ka whakamanahia ngā kāinga hou: 400
Ka whiwhi te tāone o Te Waipounamu a Kawatiri i te $13.6 miriona mai i te IAF mō te tūāhanga tūnuku me te wai hei tautoko i te whakaratonga whare noho me te āwhina kia tū pakari ake te hapori i roto i ngā āhuatanga huringa āhuarangi e tū mai.
Kāore anō kia whakatutukihia ngā hiahia wā roa ki ngā hiahia nui mō ngā whare noho i Kawatiri whānui, ā, ka āwhina te tūāhanga o te pūtea IAF kia tuwhera mai ngā whenua hei whakawhanake.
Nā te tūāhanga o te pūtea IAF atu ki te 400 ngā kāinga hou ka taea te hanga i roto i te takiwā whanaketanga o Alma Road, ā, e whai ana ki te whakarato kōwhiringa whare noho atu anō ki te hapori o Kawatiri i ngā whenua teitei ake mai i ngā wāhi e pokea ana e te waipuke.
Kei roto i ngā kaupapa tūāhanga ko te pūnaha marangai wai, wai māori me te wai para hou, te whakapai ake i te rori huanui me te piriti, me tētahi ara pahikara, hīkoi hoki.
Ōtautahi
- Kua whakaaetia te pūtea IAF: $30.9 miriona
- Ko te tikanga ka whakamanahia ngā kāinga hou: 1,400
$30.9 miriona te pūtea IAF mō te whakahou ake i te tūāhanga tūnuku hou, wai para me te wai māori, ā, ka whakatere ake tēnei i te whakaratonga whare noho i tētahi wāhi whanaketanga nui i Papanui, i Ōtautahi.
Nā te tūāhanga wai para ka whakaiti i te puhake mai o te wai i ngā wā e kaha ana te ua.
E tūmanakohia ana nā te pūtea tūāhanga tata ki te 1,400 ngā kāinga hou ka whakatūria kia tata atu ki te pokapū tāonenui, ngā whakanōhanga mātauranga, tūnuku tūmatanui, me ētahi atu ratonga tukuora hapori.
Rangiora
- Kua whakaaetia te pūtea IAF: $5.7 miriona
- Ko te tikanga ka whakamanahia ngā kāinga hou: 1,300
$5.7 miriona ka whiwhi ia Rangiora mō ngā kaupapa tūnuku me ngā wai e toru, ā, e tūmanakohia ana ka whakatere ake i te whakaratonga o ngā kāinga tata atu ki te 1,300 he utu ngāwari, mākete hoki, ā, i roto i tētahi whanaketanga whare noho i te whakarua o Rangiora.
Kaikōura
- Kua whakaaetia te pūtea IAF: $7.8 miriona
- Ko te tikanga ka whakamanahia ngā kāinga hou: 460
Tata ki te $7.8 miriona ka whiwhi i a Kaikōura mō ngā kaupapa mō te whakatū i ngā whare tata ki te 400 i ngā wāhi rerekē e rua – Vicarage Views, he wāhi whanaketanga hou i roto i te tapatāone o Kaikōura, me Ocean Ridge he wāhi whanaketanga onāianei kei te uru o te tāone ka taea mā te Huarahi Matua 1.
Hāwea
- Kua whakaaetia te pūtea IAF: $24 miriona
- Ko te tikanga ka whakamanahia ngā kāinga hou: 880
$24 miriona ka whiwhi i a Lake Hāwea mō ngā tūāhanga mō ngā wai e toru, tae atu ki te pūnaha tūhono whakapai wai para, ka āwhina tēnei kia pai ake ngā putanga taiao, ā, kia kaha ake te mahi a te pūnaha mō te tipu haere o te takiwā. Ko te tikanga tata ki te 880 ngā kāinga hou ka whakatūria nā te tūāhanga o te pūtea IAF, tae atu ki ngā whare noho utu ngāwari atu anō, i roto i te Takiwā Whare Noho Motuhake Tirohanga Roa me ngā whare noho noa e hāngai ana ki ngā matapae i roto i te QLDC mō ngā hiahia tae noa ki te tau 2041.
I pēhea te kōwhiri i ngā kaupapa mō ngā pūtea?
I whakarewahia te IAF e te Kāwanatanga hei pūtea whakataetae i te Hune 2021. I whiwhi tēnei i tētahi whakautu pai mai i ngā mana ā-rohe, ngā kaiwhakawhanake me ngā iwi, ā, neke atu i te 200 ngā tono i tae mai i te wā Ngā Whakapuakanga Hiahia tuatahi.
Whai muri i tētahi hātepe arotakenga, neke atu i te 80 ngā kaitono i tonoa kia tukuna mai he whakautu āmiki ake ki tētahi Tono mō te Kaupapa Marohi (RFP) i mua o te Tīhema 2021.
I te Āperira 2022, 35 o aua kaupapa marohi i tonoa ki te whakauru ki te wāhanga whakamutunga, ā, i roto i te āta rangahau me te whakariterite arumoni.
I arahina e Kāinga Ora te hātepe arotakenga me ngā whakaaro i tukuna mai e ētahi atu tari Kāwanatanga, ā, ko ngā whakatau pūtea whakamutunga nā ngā Minita Hanga Whare me te Pūtea.
I aromatawaitia ngā kaupapa marohi katoa ki ngā whakaritenga i whakatauhia e te Rūnanga Matua:
- Ngā putanga whare noho (40%): ka pēhea te tautoko a te Kaupapa Marohi, mēnā ka whakaratoa, i ngā putanga whare noho koinā te kaupapa o te IAF?
- Pānga o ngā pūtea (20%): he pēhea te tino hira o tēnei pūtea mō te kauneke whakamua i te tūāhanga me te whanaketanga whare noho?
- Te utu me te utu ngātahi (20%): he pēhea te tōtika o ngā utu o te Kaupapa Marohi, ā, ka pēhea te utu a te katoa i te wāhi ki a rātou?
- Te kaha me te takatū (20%): mēnā ka whakaaetia ngā pūtea, ka pēhea te pūmau ka kōkirihia te kaupapa, ā, he pēhea te tere?
E tūmanakohia ka utu ngā ariki whenua te wāhi tika ki a rātou, ā, e hiahiatia ngā pūtea mai i ngā kaunihera me ētahi atu kia whakatinanahia ngā whanaketanga whare noho.
Ngā pānui pāpāho me ngā pānuitanga hou rawa a te Kāwanatanga
- Pepuere 2023: Ētahi kāinga hou atu anō mō Te Tai Tokerau mā te haumi ki te tūāhanga i Whangārei
- Noema 2022: Ka taea ngā kāinga tini mano hou mō ngā rohe tekau mā tahi mā te haumitanga tūāhanga
- Oketopa 2022: Ko ngā pūtea tūāhanga kei te para i te huarahi mō ngā hapori hou
- Hūrae 2022: Neke atu i te 8,000 ngā kāinga hou ka taea nā te whakapūmau i te tahua tūāhanga o te $179m
- Mei 2022: Toru tekau mā rima ngā whanaketanga whare noho i te wāhanga whakamua o te tahua tūāhanga
- Tīhema 2021: Nā te whakaaetanga tuatahi mō te tahua tūāhanga ka taea ngā whare noho tāpiri o ngā iwi i Porirua
- Oketopa 2021: Ka neke te tahua tūāhanga a te Kāwanatanga ki te wāhanga whai ake
- Hepetema 2021: Kua hohoro ake te tahua pūtea a te Kāwanatanga mō te whare noho
- Hune 2021: Kua tuwhera Te Tahua Whakaterenga Hanganga
Ngā tino pātai
Kei a wai te kawenga mō te whakarato i ngā tūāhanga me te hanga i ngā kāinga?
Ko te tikanga ka whiwhi i ngā kaunihera ngā pūtea, ā, kei a rātou te kawenga mō te whakarato i ngā tūāhanga i utua e te IAF. Ka mahi ngātahi rātou me ngā kaiwhakawhanake me ngā iwi, e hanga ana i ngā kāinga.
He mea hanga te IAF hei āwhina i ngā kaunihera, ngā iwi me ngā kaiwhakawhanake ki te turaki i te tauārai tuatahi – te utu i ngā tūāhanga. Ko ngā ratonga pērā i ngā paipa me ngā rori me whakaoti i mua o te whakatūtanga o ngā kāinga.
Ā hea ka tīmata te mahi i ngā tūāhanga?
Koinei noa te tīmatanga o ngā mahi o te IAF, ā, kei te whānuitanga o ngā tūāhanga te roa o te wā. Ka āta tirotirohia te anga whakamua o ngā kaupapa takitahi e Kāinga Ora i roto i te wāhanga whakarato, hei whakarite ka taea ngā tohu nui, ā, ka tutuki ngā putanga.
Ka wātea mai ngā pūtea i te eke o ngā kaupapa tūāhanga i ngā tohu nui hira.
He aha ngā momo kāinga ka whakamanahia?
Ko te tūmanako mā ngā mahi tūāhanga ka utua e te IAF ka taea ngā tūmomo whanaketanga whare noho puta noa i Aotearoa, tae atu ki te whakaapiapitanga me ngā whanaketanga papa kākāriki whai i ngā momo whare noho rerekē. Ko ngā kainga utu ngāwari, mākete, tūmatanui, papakāinga hoki ngā putanga whare noho kei te whakaritea.
Ka taea tonu e au te tuku tētahi tono ki te IAF?
Kua kati ngā tono ki te IAF ināianei. Kua tonoa ngā mana ā-rohe, ngā kaiwhakawhanake me ngā iwi kia tono.
Ētahi mōhiohio anō
- Ngā uiui ahuwhānui: Me īmēra atu ki te Rōpū IAF i IAF@kaingaora.govt.nz
- Ngā uiui pāpāho mō te AIF: Me tuku ngā uiui pāpāho katoa mō te IAF ki mediaenquiries@kaingaora.govt.nz
- Ngā mōhiohio whakamārama, tae atu ki ngā pepa a Te Rūnanga Matua: Haere ki Te Tūāpapa Kura Kāinga(external link)
Kua whakahoungia te whārangi: 29 Huitanguru 2024