Pānui Tūmataitinga
E whakamārama ana tēnei pānui tūmataitinga he pēhea te tiaki a Kāinga Ora i ō mōhiohio whaiaro.
Ka whakamōhio i a koe he pēhea tā mātou kohikohi, rokiroki, whakamahi, otirā he aha ngā āhuatanga e āhei ana mātou ki te whakapuaki i ō mōhiohio; me pēhea tō uru atu me te whakatika i ō mōhiohio; ā, me pēhea tō tuku amuamu tūmataitinga.
Kupu whakataki
Hei whakatutuki i tā mātou matakitenga o te hanga kāinga, hapori, ao pai ake, he maha ngā mahi hira ka whakatutukihia e mātou. Ko mātau:
- he kairetiwhare whare noho tūmatanui
- he tari whanaketanga ā-tāone, ā, he hanga whare noho tūmatanui, utu ngāwari, mākete hoki, ā,
- te kaiwhakahaere a te kāwanatanga mō ngā hua me ngā kaupapa āwhina ki te whai kāinga.
Kia oti katoa ai ēnei, me kohikohi e mātou me te whakamahi i ō mōhiohio whaiaro.
Ko ngā mea ka kohia e mātou kei te āhua o tā mātou mahi me koe me te ratonga e tukuna ana, engari ko ngā mōhiohio whaiaro pea ko:
- ngā tuhinga tuakiri, hei tauira, he kape o tō uruwhenua o Aotearoa, tō tiwhikete rā whānau, te whakaūnga rānei o tō kainoho tūturu mēnā ehara koe i te kirirarau nō Aotearoa
- tō ingoa
- rā whānau
- tō wāhi noho
- ō tau waea whakapā me te wāhitau īmēra
- te hunga e noho tahi ana me koe i tō kāinga
- ō mōkai
- te āhua o te kāinga e rētihia ana e koe
- ngā taipitopito pēke, hei tauira, te whakatū i tētahi utunga aunoa i a mātou
- ngā taipitopito kaitukumahi, hei tauira, hei whakamana māu i ngā tangohanga mai i tō utu ā-tau
- tō tūnga whai mahi, he whakaaturanga o ō moni whiwhi me ētahi atu mōhiohio pūtea, pērā i tētahi tauākī takoha KiwiSaver.
Ka kohia e mātou ngā mōhiohio whaiaro mō ngā kaupapa i raro i te ture hei whakahaere i ā mātou mahi me te tuku ratonga ki a koe.
Arā ko te:
- tautuhi i a koe
- whakapā atu ki a koe
- whiriwhiri me pēhea tā mātou āwhina i a koe
- te whakarite ka whakahaeretia tō retihanga i raro i te Residential Tenancies Act 1986 me te Public and Community Housing Act 1992, me te
- whakarite ka whakahaerehia ngā hua pūtea ka whakaratoa e mātou i raro i te ture hāngai.
Ka kohia e mātou ngā mōhiohio whaiaro mai i a koe ina whakawhitiwhiti koe ki a mātou. He maha ngā āhuatanga pea ka tutuki tēnei, otirā ina:
- kōrero mai koe mā runga waea, hei tauira, ina tuhi kōrero mātou mō te waea mai, ka hopukia rānei te waea kōrero e tō mātou pokapū waea
- ka hui koe me mātou i tētahi tari a Kāinga Ora, i tō kāinga rānei
- ka kōrero mai koe ki a mātou mā te īmēra, te patowaea, ā-tuihono rānei, hei tauira, tā mātou puka urupare
- whakakī koe i tētahi puka Kāinga Ora (ā-tuihono, ā-pukapuka rānei)
- rēhita koe me te whakamahi i tētahi pūkete MyKāingaOra
- ohauru ki ngā whakamārama ā-īmēra.
Ko te tikanga ka ngana mātou ki te tiki mōhiohio whaiaro mai i a koe tonu.
Engari, ka kohia pea e mātou ō mōhiohio whaiaro mai i ētahi atu tāngata, tari hoki, arā ina whakaae koe kia kohia e mātou mai i tō māngai, tētahi atu hunga kē rānei.
Ka kohia pea e mātou mai i ētahi atu tari kāwanatanga ina tika mō mātou ki te tono i ngā mōhiohio i raro i te ture.
Hei tauira, mēnā he kaireti koe, ka kohia e mātou ngā mōhiohio whaiaro mai i te tari tuku whare noho pāpori i tohua – Te Manatū Whakahiato Ora (MSD) – i raro i te Public and Community Housing Act 1992.
Ka whakatau a MSD ko wai ka āhei ki ngā whare noho tūmatanui me te tuku mai i ngā mōhiohio whaiaro mōu me te hunga noho i tō whare e whakamahia ana e mātou hei whakatutuki i tā mātou mahi hei kaiwhakarato whare noho pāpori, hei aromatawai i ngā whare noho tūmatanui e wātea ana me te whakauru i a koe ki tētahi kāinga tōtika i runga i tō hiahia me tō āheitanga.
Ka whakaurua e MSD ngā mōhiohio mō tō:
- taumata hiahia whare noho
- momo me te wāhi o ngā whare e tika ana mōu me te hunga noho me koe
- ngā mōhiohio hāngai ki te toitūtanga retihanga, me
- te Rēti Hāngai ki te Moni Whiwhi ka tātaitaitia mōu me te hunga noho me koe.
Ka hanga me te pupuri i tētahi taiao haumaru mō te tiakitanga o ō mōhiohio whaiaro me ō pūkete. Ka aroturukihia, ka tātarihia, ka ōtitahia hoki ā mātou pūnaha.
E herea ana ngā kaimahi katoa a Kāinga Ora, ngā hoa tautiaki me ngā ringarehe kia ū ki te Ture Matatapu 2020 ina whawha ana i ō mōhiohio whaiaro.
Ka whakangungua ā mātou kaimahi hei whakarite ka whakaaronuitia, ka manaakitia, ka arohia hoki ō mōhiohio.
Te whakamahi i te kapua
Me kī, ko te mahi rorohiko ā-kapua koinā te whakaratonga o ngā ratonga rorohiko, pērā i te rokiroki me te pūmanawa, mā te ipurangi ("te kapua").
I Kāinga Ora, ka rokirokitia e mātou me te tukatuka i ētahi mōhiohio ki ngā pūhara kapua i waho o Aotearoa, tae atu ki a Microsoft Azure (pūhara rorohiko), Microsoft 365 (pūmanawa whakaputaranga) me Snowflake (putunga me te tukatuka raraunga). Ko te tikanga o tēnei ko ngā mōhiohio ka puritia e mātou mōu ka whakawhitia atu pea, ka taea rānei, mai i waho o Aotearoa.
Ka whai mātou i ngā mahi katoa e tika ana hei whakarite kia kaua ngā mōhiohio mōu e rokirokitia ana, ka tukatukahia rānei e ā mātou āpiha hunga kē e ngaro, e uru poka noatia, e whakapuakina hoki, e whakarerekēhia, e whakangaromia, e raweketia rānei. E rata ana mātou kei te ū ā mātou kaiwhakarato ki ngā paerewa haumarutanga raraunga teitei, ahakoa i Aotearoa, i waho o Aotearoa rānei.
Ka whai mātou i ngā mahi tōtika ki te whakarite i te tika o ngā mōhiohio whaiaro ka kohia, ka whakamahia, ka whākina rānei e mātou.
Ina tuku mōhiohio mai koe ki a mātou, ahakoa hāngai tonu, mā tō māngai rānei, ka whakahoutia e mātou ā mātou pūkete.
Nōu te mana ki te tono kia whakatikahia ngā hapa o ngā mōhiohio e puritia ana e mātou mōu.
Ka puritia e mātou ō mōhiohio whaiaro mō te wā e tika ana kia tutuki ai te kaupapa i kohia ai e mātou.
Mēnā ka noho ō mōhiohio whaiaro hei wāhanga o ō pūkete Kāinga Ora, ka pupuri mātou i ngā mōhiohio i runga anō i te Public Records Act 2005.
Ina mutu tō mātou hiahia ki ō mōhiohio whaiaro, ka haumaru tā mātou whakakore atu, e ai ki tā mātou Kaupapahere Pupuri me te Whakakore Pūkete.
Ka whakamahia e mātou ngā mōhiohio whaiaro ka kohia e mātou mai i a koe ki te mahi i ā mātou mahi tika, o ia rā. Ka whakamahia pea e mātou ō mōhiohio whaiaro mō ēnei kaupapa, arā:
- te whakaū i tō tuakiri
- te tuku i ā mātou ratonga ki a koe, pērā i te whakaratonga o ngā whare noho tika ki te hunga kei runga i te Rēhita Whare Noho Pāpori, te whakatū me te whakahaere i tētahi whakaaetanga retihanga, te tukatuka rānei i tētahi tono mō tētahi hua whai kāinga
- te whakapai ake i ā mātou ratonga, hei tauira, te mārama ki ngā manakohanga o ā mātou kiritaki ina whakamahi ana i ā mātou paetukutuku me te whakarei ake i taua wheako
- ngā kaupapa tātari tatauranga me te rangahau, engari kia kaua e whakaputaina ngā otinga mā tētahi āhuatanga e mōhiotia ai koe.
Te wāhi e hiahiatia ana, me whakamahi rānei i ō mōhiohio whaiaro ki tētahi tikanga hou, rerekē rānei, ka oti anake i a mātou tērā mā tō whakaae, ina hiahiatia ana rānei, ina whakaaetia rānei e te ture.
E kore e whakapuakina e mātou ō mōhiohio whaiaro ki hunga kē ki te kore tō whakaae, hāunga ngā wā e whakahautia, e āhei rānei i raro i te ture, tae atu ki ngā āhuatanga o te whakapuaki tētahi o ngā kaupapa i riro mai ai i ā mātou ngā mōhiohio. Hei tauira, ka whakapuakina pea e mātou ō mōhiohio whaiaro:
- ki ō mātou hoa tautiaki me ngā ringarehe kia taea ai e rātou te whakahaere ngā mahi tautiaki ki tō kāinga, hei tauira, ō taipitopito whakapā, te raru kei te whakatikahia, ā, mēnā he kurī kei runga i te papanoho
- ki ngā kaiwhakarato whaipainga hei whakarite i te tūhonotanga me te whakahaerenga o ngā ratonga hira i tō kāinga
- ina tono koe, a Kāinga Ora rānei ki te Taraipiunara Retihanga (ka whiriwhiria e te Taraipiunara Retihanga ngā wenewene katoa i waenga i ngā kairetiwhare, tae atu ki a Kāinga Ora, me ngā kainoho)
- ki a MSD kia pai ai tā rātou mahi i ā rātou mahi hei tari whare noho pāpori
- ki ētahi atu tari kāwanatanga. Kāore i te whāiti ki ēnei anake:
- Ngā Pirihimana o Aotearoa
- Te Tāhū o te Ture
- Ara Poutama Aotearoa
- Te Manatū Hauora.
- ki a Tatauranga Aotearoa mō ngā kaupapa tatauranga i raro i te Data and Statistics Act 2022
- ki ētahi atu tari whakarekereke whānau i raro i te Ture Whakarekereke Whānau 2018, ētahi atu tari tiaki me te whakamaru tamariki i raro i te Ture Oranga Tamariki 1989
- ina tika ana kia tūhuratia ngā hara, ina tino whakaraerae rānei te hauora, te haumaru rānei o te tangata. Mēnā ka whakatumahia, ka tūkinotia rānei ā mātou kaimahi, ka tonoa pea e mātou te take nei ki ngā pirihimana, me te whāki i ngā mōhiohio e hāngai ana.
Me whai mōhiohio whaiaro hei tātari i tō tono me te tōtika o tō mahi i Kāinga Ora. Ka puritia, ka whakamahia me te whakapuaki i raro anake i te Ture Matatapu 2020 me te Public Records Act 2005.
Ko ngā mōhiohio katoa ka whakaratohia e koe i roto i tō tono ka tiakina e Kāinga Ora kia matatapu, ka mutu ka whakamahia anake mō te kaupapa i kohia. Mēnā ka angitu tō tono, ka puritia ēnei mōhiohio ki tō kōnae whaiaro, ā, ka whakamahia anake mō ngā kaupapa o tō mahi me mātou.
Aotal Ltd (SnapHire)
Ina tono tūranga koe i Kāinga Ora, ka tukuna e koe tō tono mā Aotal Ltd (SnapHire), he pūnaha whakahaere rapu kaimahi ā-tukutuku tēnei. Tirohia he pēhea te whakahaere a Aotal Ltd(external link) i ō mōhiohio whaiaro.
Kia pūmau ai mātou ki te tuku ratonga kiritaki rawe, ka hopukia ngā waeatanga mai katoa ki tā mātou Pokapū Tautoko Kiritaki (pokapū waea).
Ka hopukia e mātou ngā waea:
- mō ngā kaupapa whakangungu kaimahi
- hei whakapai ake i te kounga o tā mātou ratonga kiritaki
- hei whakarite he tika te whakaaturanga o tō waea.
Ka rokirokitia ā mātou waea mō te 12 marama kātahi ka whakakorehia haumarutia.
Te tono i tō waeatanga atu
E āhei ana koe ki te tono kia uru atu me te whakatika i ngā mōhiohio whaiaro kei a mātou mōu. Tirohia Te tono i ō mōhiohio whaiaro ki te kimi me pēhea tō tono tārua o tō hopukanga waea.
Ngā pihikete
Ka whakamahi mātou i ngā pihikete ki te whakapai ake i tō wheako i ā mātou paetukutuku. He kōnae kuputuhi iti ngā pihikete, ka puritia e tō pūrere ina toro atu koe ki te nuinga o ngā paetukutuku. Kāore ngā pihikete e kohikohi mōhiohio whaiaro engari he mōhiohio e whakapai ake ana i te taumahinga, ā, nā ēnei i āhei ai te whakatairanga i ngā hua me ngā ratonga motuhake, i poua ki ngā mariu kaitoro. Ka taea e koe te mono ērā, te ūkui rānei i tō pūtirotiro tukutuku me te kore whai pānga ki tō kaha ki te whakamahi i te pae.
Ngā Tatauranga Pae
Kua whakaurua atu te Google Analytics, he utauta tātari tukutuku, ki ā mātou paetukutuku. Ka hopu i te Google Analytics ēnei mōhiohio e whai ake ina toro koe i ā mātou paetukutuku:
- te pūtirotiro (hei tauira, Chrome) me te pūnaha whakahaere (hei tauira, Windows XP) ka whakamahia e koe
- te taumira mata o tō rorohiko
- te wā me te rā ka toro koe ki tā mātou pae
- ngā whārangi ka toroa e koe me ngā kōnae ka tikiake koe
- te wāhitau ipurangi ka uru atu koe ki tā mātou pae (te wāhitau KI)
- ngā kupu rapu ka whakamahia e koe hei kimi ihirangi
- te pae whakamutunga i toroa e koe i mua i tō haerenga mai ki tā mātou pae.
Kua puritia tēnei mōhiohio ki tētahi tūmau Google. Ka taea anake e ngā kaimahi whaimana i roto i tō mātou tari te uru ki ngā mōhiohio.
Tirohia ngā mātāpono haumarutanga me te tūmataitinga a Google mō Google Analytics(external link).
Te tūhono ki ngā pānui īmēra a Kāinga Ora
Ina tūhono koe ki tētahi o ā mātou pānui, īmēra rānei, ka haumaru te rokiroki i ngā taipitopito ka tukuna mai e koe.
Mā te tuku i ō mōhiohio, kei te tuku whakaae ki te whiwhi īmēra mai i a mātou, e ai ki te Unsolicited Electronic Messages Act 2007(external link).
Ka taea e koe te makere mai ahakoa te wā, ā, ka whakakorehia mai ō taipitopito mai i te rārangi mēra.
E āhei ana koe ki te tono kia uru atu koe ki ngā mōhiohio whaiaro kei a mātou mōu. Hei tiaki i tō tūmataitinga me te tūmataitinga o ētahi atu, me whakatūturu pea e mātou tō tuakiri i te tuatahi. Ka taea hoki e koe te whakauru atu ki ō mōhiohio i ngā wā katoa mā MyKāingaOra.
Ka whakautua e mātou tō tono i roto i te 20 rā mahi o tā mātou whiwhi. Ka whakamōhio atu mātou ki a koe mēnā me whakaroa ake te wā mō tā mātou whakautu. Ina whakakāhore mātou i tētahi tono āhei, ka tukuna e mātou he reta me te kī he aha i whakakāhoretia ai, ā, me te whakatakoto i ētahi atu hātepe hei whai māhau.
Ka āhei koe ki te tono kia uru atu koe ki ō mōhiohio whaiaro mā tētahi o ēnei ara e whai ake:
- Waea mai ki 0800 801 601
- Whakaotihia tā mātou puka Ngā Uiui me te Tuku Whakaaro
- Me kōrero, me īmēra rānei ki tō Kaiwhakahaere Tautoko Whare Noho
- Haere mai ki ō mātou tari Kāinga Ora ahakoa te wā mai i te 9am ki te 4pm, Mane ki te Paraire
- Tuhi ki a Kāinga Ora – Homes and Communities, PO Box 2628, Wellington 6140
- Īmēra Privacyofficer@kaingaora.govt.nz
Ka āhei hoki koe ki te tuku tono mā te Request My Info Tool e whakaratoa ana e Te Mana Mātāpono Matatapu i runga i tana paetukutuku: Te Mana Mātāpono Matatapu | AboutMe (Request My Info Tool)(external link)
E āhei ana koe ki te tono kia whakatikahia ngā mōhiohio mēnā ki ōu whakaaro kei te hē. Ka tātaritia e mātou tō tono me te whakautu i roto i te 20 rā mahi o tā mātou whiwhi. Kātahi ka huria e mātou ngā mōhiohio hāngai, ka whakamāramahia rānei he aha ki ō mātou whakaaro me noho pērā tonu ngā mōhiohio. Mēnā kāore e whakatikahia e mātou, e āhei tonu ana koe kia tāpirihia atu tāu ake tauākī whakatika, ā, ka tuhia atu e mātou he kōrero o tō tono ki ā mātou pūkete kia huria.
Hei tiaki i tō tūmataitinga me te tūmataitinga o ētahi atu, me whakatūturu pea e mātou tō tuakiri i te tuatahi.
Ka āhei koe ki te tono kia whakatikahia ō mōhiohio whaiaro mā tētahi o ēnei ara e whai ake:
- Whakaotihia tā mātou puka Ngā Uiui me te Tuku Whakaaro
- Tuku īmēra ki tō Kaiwhakahaere Tautoko Whare Noho
- Tuhi ki a Kāinga Ora – Homes and Communities, PO Box 2628, Wellington 6140
- Īmēra Privacyofficer@kaingaora.govt.nz
I Kāinga Ora, e pūmau ana mātou ki te whakarite i ō mōhiohio whaiaro i runga i te manaaki me te whakaaronui. Mēnā e whakapono ana koe kāore i tutuki i a mātou tērā, me tuku kōrero mai koe, me tuku amuamu rānei.
Te tuku amuamu mai ki a mātou
Ka taea e koe te tuku amuamu mai mā tētahi o ēnei ara:
- Waea mai ki 0800 801 601
- Whakaotihia tā mātou puka Ngā Uiui me te Tuku Whakaaro. Me tīpako noa i te 'Amuamu' i raro i te 'Momo uiui'
- Me kōrero, me īmēra rānei ki tō Kaiwhakahaere Tautoko Whare Noho, tōna Kaiwhakahaere rānei
- Haere mai ki ō mātou tari Kāinga Ora ahakoa te wā mai i te 9am ki te 4pm, Mane ki te Paraire
- Tuhi ki a Kāinga Ora – Homes and Communities, PO Box 2628, Wellington 6140.
Te tuku amuamu mai ki tā mātou Āpiha Tūmataitinga
Mēnā kei te hiahia koe ki te tuku amuamu i raro i te Ture Matatapu 2020, me whakapā mai ki tā mātou Āpiha Tūmataitinga:
Privacy Officer
Kāinga Ora – Homes and Communities
PO Box 2628
Wellington 6140
Īmēra: privacyofficer@kaingaora.govt.nz
Te tuku amuamu mai ki Te Mana Mātāpono Matatapu
Mēnā kāore koe i te rata ki te whakautu a te Āpiha Tūmataitinga ki ō māharahara, ka āhei koe ki te tuku amuamu mai ki Te Mana Mātāpono Matatapu:
Te Mana Mātāpono Matatapu
PO Box 10094
Wellington 6143
Waea 0800 803 909
Waea Whakaahua 04 474 7590
Īmēra: enquiries@privacy.org.nz
Mēnā ka tuku amuamu koe ki tētahi rōpū o waho, he mana waeture rānei pērā i ngā Tari a Te Mana Mātāpono Matatapu, Te Kaitiaki Mana Tangata rānei, ka tuari pea e mātou ō mōhiohio ki a rātou mō ā rātou uiui.
Kua whakahoungia te whārangi: 13 Whiringa-ā-rangi 2023