Ko ‘emau Ngaahi Polokalamá

Renewable Energy Programme (Polokalama ki he Ma‘u‘anga Ivi Fakaenatulá)

‘Oku fokotu‘u ‘e he Kāinga Ora ha ngaahi pēnolo sola ‘i he ngaahi ‘api ‘e ni‘ihi kuo filifili takatakai ‘i he fonuá, ke tokoni ki hono fakasi‘isi‘i ‘a e fakamole ‘o e ma‘u‘anga iví ki he ‘emau kau nofo totongí pea ngaohi ke toe leva‘i lelei mo tu‘uloa ange ‘emau ngaahi ‘apí. ‘Oku taumu‘a ‘a e ngaahi ‘ahi‘ahi ko ení ke mahino‘i ‘a e founga ‘e lava ke ma‘u ‘aonga ai ‘a e kau nofo totongi Kāinga Ora mei he ngaahi pēnolo solá, mo e founga te mau lava ai ‘o ‘oatu ‘a e ngaahi lelei ‘o e ma‘u‘anga ivi fakaenatulá ki he kau nofo totongi tokolahi ange ‘i he kaha‘ú.

Kapau ‘oku ‘i ai ha ngaahi pēnolo sola ‘i ho‘o ‘apí, ma‘u ha fakamatala lahi ange.

Polokalama ‘a e Kāinga Ora ki he Fakalelei Falé (Retrofit)

‘Oku ngaohi ‘e he Kāinga Ora ‘emau ngaahi ‘apí ke māfana, mātu‘u mo fakatupu mo‘ui lelei ange ke tokoni ki hono fakalelei‘i ‘o e tu‘unga lelei ‘o e mo‘ui ‘emau kau nofo totongí. Fakafou ‘i he ‘emau Retrofit Programme, ‘oku mau fakalakalaka‘i ai mo fakalelei‘i ‘a e ni‘ihi ‘o ‘emau ngaahi ‘api motu‘a angé ke tokoni ki hono tuku atu ha ngaahi ‘api faka‘ofo‘ofa ki he ‘emau kau nofo totongí.

Polokalama ki he Ngaahi ‘Api Fakatupu Mo‘ui Leleí

‘Oku mahu‘inga ke māfana, mātu‘u, fakatupu mo‘ui lelei ho ‘apí pea malu ‘i he taimi kotoa pē, koe‘uhí ke ke nofo lelei ai mo ho fāmilí. ‘Oku mau tokanga‘i eni fakafou ‘i he ‘emau ngāue fakalelei kuo fakataimitēpile‘í, pea mo hono fakapapau‘i ‘oku a‘usia ‘e ho‘o ‘apí ‘a e ngaahi tu‘unga ‘i he Healthy Homes Standards.

Na‘e fokotu‘u ‘e he Pule‘angá ‘a e Healthy Homes Standards(external link) ‘i he 2019 ke tokoni ki hono fakalelei‘i ‘a e tu‘unga lelei ‘o e ngaahi ‘api nofo totongi kotoa pē ‘oku nofo‘i ‘i Nu‘u Sila. Na‘e pau ki he ngaahi ‘api kotoa ‘oku ma‘u mo tokanga‘i ‘e he Kāinga Ora ke nau fakakakato ‘a e ngaahi tu‘unga mā‘ulalo taha ki he mīsini fakamāfaná, ‘aofi fakamāfaná, fehū‘aki ‘o e ‘eá, fehū‘aki ‘o e hahaú (hahau) mo e fakatafenga vaí, mo e ta‘ofi ‘o e fehū‘aki ‘a e ‘ea momokó ‘i he ‘aho 1 ‘o Siulai 2024.

Ke fakapapau‘i ‘oku hokohoko atu ‘a hono fakakakato ‘e ho‘o ‘apí ‘a e ngaahi Tu‘unga ko ení, ‘e fakakau ai ‘a e ngaahi sivi ‘i he ngaahi sivi fakata‘u ‘o e ngaahi ‘apí. Te ke lava foki ‘o tokoni ‘aki hono fakahoko mai kiate kimautolu kapau ‘oku ‘i ai ha fa‘ahinga ngāue monomono ‘oku fiema‘u lolotonga e ta‘ú.

Right at Home Programme (Polokalama ‘o e Hoko ‘o Lelei ‘i ‘Apí)

Ko e nofo ‘i ha ‘api māfana, mōmoa mo mo‘ui leleí ‘e lava ke tokoni ia ki hono fakasi‘isi‘i ‘a e fakatu‘utāmaki ‘o e ngaahi tu‘unga mo‘ui lelei mo e palopalema ki he halanga mānavá ‘oku ala ta‘ota‘ofí.  

‘Oku tokangataha ‘emau Right at Home Programme ki hono fakasi‘isi‘i ‘a e fakatu‘utāmaki ‘o e ngaahi mahaki felāve‘i mo e falé (housing-related illness) ki he kakai tu‘u lavea ngofuá mo e kakai/fāmili ‘i ho ‘apí.

‘Oku mau ma‘u ‘a e ngaahi fakafehokotaki ki he Right at Home Programme mei he ngaahi sēvesi ‘oku fakapa‘anga ‘e he Te Whatu Ora/Health New Zealand ‘oku ‘iloa ko e Healthy Homes Initiatives, ‘oku mau fakamu‘omu‘a ‘a e ngaahi ngāue monomonó mo e ngaahi fakaleleí kau ai ‘a e ngaahi fakatonutonu (updates) ke a‘usia ‘a e ngaahi Healthy Homes Standards (Ngaahi Tu‘unga ki he ‘Api Mo‘ui Leleí) ‘a e Pule‘angá.

Ko e ngaahi fakaleleí ‘e ala kau ki ai hono fokotu‘u ha mīsini ki he fehū‘aki ‘a e ‘eá, ‘i he peitó pe fale kaukaú, fola pe fetongi ha kāpeti, ngaahi puipuí mo e ‘aofi māfaná mo hono fokotu‘u ha ngaahi ma‘u‘anga ivi fakamāfana fo‘ou pe ko hono toe fakalahi.

Na‘e fa‘a ‘iloa kimu‘a ‘a e Right at Home ko e Rheumatic Fever Prevention Programme.

Ko ‘emau polokalama ki he malu mo e hao ‘o e halanga me‘alelé

‘Oku mau tokanga ki he tu‘unga malu ‘a ‘emau kau nofo totongí pea ‘oku mau fie fakahoko ‘a e me‘a te mau ala lavá ke fakapapau‘i ‘oku hao ‘a e longa‘i fānaú mei hano tui‘i mo lavea ‘i he ngaahi halanga me‘alele ‘i homau ngaahi ‘apí.

‘Oku tokanga taha ‘emau polokalama malu mo hao ‘o e halanga me‘alelé kuo ma‘u palé ki hono fakamavahevahe‘i ‘a e ngaahi feitu‘u fai‘anga va‘inga ‘a e fānaú mei he ngaahi halanga me‘alele ‘i he ngaahi ‘api ‘oku ‘i ai ha longa‘i fānau ‘oku si‘isi‘i hifo he ta‘u 5.

Ko ‘emau polokalama ki he malu mo e hao ‘o e halanga me‘alelé