Te Rautaki Taiao

E whakatakotoria ana e te Rautaki Taiao [PDF, 1.1 MB] ā mātou kawenga taiao, me ngā mahi e whakamaheretia ana me te aronga ki te hanga i te māramatanga ngātahitanga o ā mātou kaupapa matua mō te toitūtanga. Ka tukuna te ahunga mārama mō te wāhi me arotahi ā mātou mahi, me ngā nekehanga e hiahiatia ana hei whakatutuki i ā mātou whāinga taiao, i te wā tonu e whakaū ana i te hira o te mahi ngātahi ki ō mātou hoa, ki ā mātou kiritaki, ki ō mātou hapori hei tuku i ēnei putanga.

E pūtakehia ana ngā mahi i tā mātou rautaki e ngā mātāpono matua e toru:

1. Te whakarite i te whakawhitinga tika mō ā mātou kiritaki, mō ō mātou hapori
2. Te tautoko i ngā wawata o te Māori mō te toitūtanga i ngā wāhi e hiahia ana rātou ki te noho
3. Te piri ki ngā ara ka puta ake i runga i te hōkai, i te tūnga hoki o Kāinga Ora i ngā rāngai hangatanga me te whanaketanga whenua.

Mō te tuku i ēnei mātāpono, e whai ana mātou ki te whakatutuki i ngā putanga matua e whā:

1. Te ārai i te whakaputa tukunga, te whakaoti whakatau rānei ka hua ake kia whakaputa tukunga ētahi atu (tae atu ki te whakawhiti i ō mātou whare noho, i ō mātou tūāhanga, i ā mātou mahi kia tukunga kore).
2. Te pai me te tōtika o te whakamahi rawa inarā te whakaiti i te wai ka whakapaua, i te para ka whakaputaina, i ngā rawa ka whakamahia, mā konei e tautokona ana te whakawhitinga ki te ōhanga āmiomio.
3. Te whakarākei i te taiao tūturu e whakaora ana i te mana, i te mauri o te whenua, o ngā awa hoki, i runga i te mōhio ki te kore te whenua e hauora, ka whakataumahatia ia wāhanga o te oranga o te whānau.
4. Te whakangāwari i ngā tūraru o te huringa āhuarangi hei whakaiti i ngā putanga āhuarangi kino mō ō mātou kāinga, mō ā mātou kiritaki, mō ō mātou hapori, tae atu ki te ārai i ngā whare, i te whenua.

Ō mātou nekehanga 10 matua

Ko te mahere huarahi ēnei nekehanga rautaki ki te whakatutuki i ā mātou putanga matua puta noa i ā mātou mahi ā-whakahaere, ā-whare noho, ā-whanaketanga ā-tāone hoki. Ko te mea nui, ka arotahi ā-roto ngā nekehanga e toru tuatahi, hei whakarite kia whakatōngia te māramatanga ki te toitūtanga me te āhuarangi ki ngā mahi matua, ki ā mātou tukanga rapu whakatau matua anō hoki.

Ā-Whakahaere

1. Whakatōngia te whakahaerenga tūraru huringa āhuarangi ki te rapu whakatau
Te whakatō i te tūraru āhuarangi o nāianei, o te anamata anō hoki ki tō mātou whanaketanga ā-tāone, ki te hanga, ki te rapu whakatau anō hoki, e whai whakaarohia ana he aha ka hangaia e mātou, ā, ka hangaia ki hea.

2. Whakaūngia te whakangāwari huringa āhuarangi ki te rapu whakatau
Te pūrongo i ngā pānga tukunga o ngā tuhinga rapu whakatau matua katoa, me te whakatinana i tētahi utu waro ā-roto hei kauwhiti ki te tuku i ā mātou ūnga whakaheke tukanga.

3. Ngā rārangi tukanga me ngā mahere whakaheke
Te whakawhanake i ngā rārangi roanga-o-te-ao mō ngā tukunga me ngā mahere whakaheke tukunga e hāngai ana ki ngā here a te Kāwanatanga me te ara haere o te 1.5°C mō ā mātou mahi ā-rangatōpū, ā-whare noho, ā-whanaketanga ā-tāone hoki.

Te whare noho

4. Te whare noho waro kore
Te kōkiri i te hōtaka whare noho waro kore hei whakatutuki i ngā ūnga whakaheke tukunga me te whakakā i ngā whakapainga ake mō te whakatutukitanga i te rāngai whānui ake. 

5. Te pūngao hangarua
Te whakatinana i te pito mata o te whakaputa pūngao hangarua i te wāhi tonu o ō mātou rawa whare noho tūmatanui ki te whakaheke tukunga, ki te whakaheke hoki i te pōharatanga ā-pūngao mō ā mātou kiritaki. 

6. Te whakaiti i te para hangatanga me te whakawātea wāhi
Te hoahoa i ō mātou rawa, i te whakawātea wāhi, i ngā mahi tautiaki mā te āhua ka whakaiti ai i te para, ka whakauka hoki i ngā rawa, i ngā waehanga hoki hei whakamahinga anō, hei tautoko i te aronga whakawhiti atu i te kāwanatanga mō te whakawhiti atu ki te ōhanga āmiomio.

Te whanaketanga ā-tāone

7. Te whanaketanga ā-tāone me te tūāhanga waro iti
Te whakamahere i ō mātou whanaketanga kia whakahekea ai te parahanga waro, ka whakapikihia ai te manawaroa āhuarangi, ka whakarauoratia ai ngā pūnaha māori. Te whakaheke i ngā pānga o te tūāhanga e hiahiatia ana, e whakaaheingia ana e mātou mā ō mātou whanaketanga. 

8. Te huringa momo ikiiki
Te tautoko i ngā hapori ki te whakawhiti ki ngā kōwhiringa kē mō te ikiiki he tukunga iti.

9. Te ngahere i ngā taiao hapori
Te tūhono anō i ngā hapori ki te taiao e pātata ana ki a rātou, me te tautoko i te whakaoranga taiao me te aronga ki te whakapiki i te ngahere ki ngā taiao tāone.

10. Te whakaora i te mauri o ngā awa
Te hoahoa i ō mātou takiwā noho kia whakaora i ngā kōawa, i te hononga o te whenua ki te wai; ā, kia whakaheke i te parawai ka uru atu ki ō tātou kōawa.

Ētahi mōhiohio anō

Pānuitia atu anō mō te āhua o tā mātou hanga i ngā kāinga, i ngā hapori e manawaroa ā-āhuarangi ana.